Taažâ Wikimedia lii nomâttâm kielâtotkee Trond Trosterud ive 2022 Wikipedistin ihečuákkimstis Oslost kuovâmáánu 2023 aalgâst. Piäiválii pargostis Trond Trosterud parga sämikielâi kielâteknologiain Tromsa ollâopâttuvâst Kielâteknost Taažâst.
Taažâ Wikimedia tieđeet, et Trond Trosterud lii lamaš kuávdáš olmooš Taažâ Wikipedian. Wikipedia lii maailm stuárráámus tiätuvuárkká, mii lii viermist tuáimee uuccâmtoimâ. Tot lii finnimnáál paijeel 300 kielân.
Taažâ Wikimedia haldâttuv saavâjođetteijee Marie Nicolaisen mield ”rijjâääigi Trond Trosterud lii ohtâ aktiivlumos Wikipedia čällein […], kote lii riggodâm tiätusänikirje maaŋgâ kielân já čáállám eromâšávt uuraalláid kieláid kyeskee artikkâlijd”. Trond Trosterud roolâ lii lamaš čuuvtij tehelâš meid aalmugijkoskâsii pargoost. Sun lii jo kuhháá ovdedâm 60 Wikimedia-organisaatio wikid. Wiki lii viermisijđostâh, moos kevtteeh pyevtitteh siskáldâs oovtâst čälimáin.
Trond Trosterud lii meid lamaš kuávdáš olmooš anarâškielâ iäláskittemtooimâst. Suu ánsu lii ovdâmerkkân tot, et anarâškielâst lii jieijâs tivvoomohjelm, morfologisâš analysaattor já eres-uv kielâteknologisiih piergâseh.
Käldee:
– Tromsømann er årets «wikipedianer» (www.itromso.no)
Kove: Marja-Liisa Olthuis