Sri Lanka heivit ijjâjunáidis äigitaavluid vildâelefantij suojâlem keežild. Sri Lanka ryevdikiäinulágádâs tuáivu, et uđđâ äigitavlu iästáččij junáluhottesvuođâid elefantijgijn. Kuovâmáánu loopâst stuorrâ elefantčuurâ paasij luándureservaatist huáppujuná vuálá. Luhottesvuođâ keežild juná skirvânij olgos vyeijimraađeest, já ubâ elefantčuurâ jaamij. Juná mađhâšeijeeh iä ruásnulum luhottesvuođâst.
Sri Lanka media mield oohtânpeeškitmeh elefantijgijn láá čuuvtij lasanâm. Majemui 17 ive ääigi eenâb ko 130 elefantid láá jáámmám junáluhottesvuođâin. Taat lii suijân toos, mondiet ryevdikiäinulágádâs váldá anon uđđâ äigitaavluid já keeppid ijjâvuáruid. Tagareh ijjâvuáruh, moh kärttih vyeijiđ meeci čoođâ, kepiduvvojeh eromâšávt eennâm taavaabeln já nuorttiibeln. Eres-uv tooimah tahhojeh. Ovdâmerkkân ryevdikiäinui kuorâst miestuuh čuáppojeh, já sajan piäijojeh lase laampuh, vâi junávyeijeeh uáinih pyerebeht elefaantij liihâdmijd. Ton lasseen meccisoojijd puátih lihâdemsensoreh, moh äiccih elefaantijd, já rääigih tiävdojeh ryevdirađe kooskâst, amas elefanteh rokkâsiđ raigijd kiddâ. Ijjâlinjáid piäijojeh meid šleđgâjunáh tondiet ko toh orosteh jotelubbooht ko táváliih junáh.
Elefantij meeri Sri Lankast lii kiäppánâm jo kuhháá. Vala 1800-lovvoost arvâlui, et enâmist lijjii 14 000 elefantid. Majemuš rekinistem tohhui ive 2019, já uđđâ rekinistmij mield enâmist láá tuše 7 500 elefantid.
Käldee:
– Minder nachttreinen in Sri Lanka om botsingen met olifanten te voorkomen (nos.nl)
Kove: Suhridam (Wikimedia Commons)