Crans-Montana Café Le Constellation pyelimist uđđâvuođâiijâ lammâšum ulmuin 67:s láá ain tipšoost pyellimváddu- tâi vajoidittemkuávdáin Sveeicist já eres Euroop enâmijn. Pyelimist lammâšuvvii ohtsis 115 olmožid. Mottoom peivi tassaaš kyevtis sirduin olgoeennâm pyellimváddukuávdáin Sveeici vajoidittemklinikáid, tastko sunnuu tile lii tääl tommit puáránâm.
Sveeici tiervâsvuotâvirgeomâhái mield aldemui aigij vala eenâb pyecceeh pyehtih maccâđ Sveeicin vajoiditmân. Vyerdimist lii, et motomeh lammâšum ulmuuh peesih forgâ meddâl pyecceiviäsust teikâ vajoidittemkuávdáást já pyehtih maccâđ páikkásis.
Sveeici čuoigâmkuávdáást Crans-Montanast sattum traagisii pyelimist jammii 40 olmožid. Pajeláhháá kyehti oho tassaaš ohtâ 18‑ihásâš sveiccilâš jaamij pyellim keežild šoddâm komplikaatioid.
Tipšo maaŋgâ enâmist
Luhottesvuođâ maŋa 38 lammâšum olmožid tuálvojii tiipšon pyellimváddukuávdáid olgoenâmáid. Sist kutnubáloves finnejeh tipšo Ranskaast, viiđâs Saksaast, kyehtnubáloves Italiast já kuulmâs Belgiast. Ohtsis 31 pyecced finnejeh tipšo Sveeicist. Sist 22:s láá ain pyecceiviäsust já oovces vajoidittemklinikijn.
Pyellimvááduin puáránem
Tuáhtáreh láá muštâlâm vuáládâheennâmlii almosradiofinnodâhân NOS:ân vädis pyellimváádui puárránmist. Pyellimvááduin vuosmuuh peeivih láá puáránem ovdánem tááhust merhâšitteeh. Iänááš ulmuuh, kiäh eelih vuosmuid peeivijd pyelimis maŋa, cevzih, jis sijjân iä šoodâ infektioh.
Tuáhtárij mield nuorâ ulmuin láá pyerebeh máhđulâšvuođah cevziđ. Tuoibâm lii kuittâg hiđes proosees, mut maaŋgah pyellimvááduin killám ulmuuh pasteh kuittâg loppâloopâst eelliđ jiečânávt.
Käldee:
– Nog 67 gewonden in ziekenhuizen of revalidatie na brand Crans-Montana (nos.nl)
Kove: cezjaw (Pixabay)