Brexit ađai “Britannia vuolgâ” lâi proosees, mon loppâpuáđusin Britannia iäruttui Euroop unionist.
Brexit aalgij ive 2016 aalmugjienâstmist. Talle brittiliih meridii iäruttuđ Euroop unionist. Jienâstem puátusân láá maaŋgah suujah, el. Britannia jiešmeridemvuoigâdvuotâ, pargovyeimi rijjâ lihâdemvuotâ já Euroop patâreijeikriisâ.
Brittilij mielâst Brexitist lii lamaš ävkki aainâs-uv jiečânâs enâmânvarrimpolitiik tááhust. Tääl enâmânvärrejeijeeh ferttejeh sárnuđ eŋgâlâskielâ pyereest, mii tiäđust-uv taha sii integraatio ohtsâškoodán älkkeebin.
Hááituh láá kuittâg lamaš eenâb ko äävhih. Ton čuávumuššân Britanniast pyehtih monâttuđ joba 100 000 fiinaanssyergi pargosaijeed, tastko ton syergi finnoduvah láá varriimin Euroop union enâmáid – eromâšávt Irlandân. Ton lasseen maaŋgâin finnoduvâin láá lamaš stuorrâ vädisvuođah sirduđ uđđâ asâttâssáid já lavváid. Tot lii távjá lamaš meiddei tiivrâs. Tuulih láá maccâm Britannia já Euroop union kooskân, mon keežild tävirij já ulmui lihâdem lii tääl čuuvtij vaigâdub. Statistiikeh čäittih, et Brexit lii hiäjusmittám Britannia ekonomia. Pargovyeimi vänivuotâ lii meid lamaš stuorrâ čuolmâ, tastko pargeeh iä lah innig älkkeht finnimnáál Euroop unionist.
Brexitist láá lamaš hááituh meiddei Euroop unionân. Britannia lâi tehálâš ruttâdeijee EU:n, já tondiet Euroop union ruttâdemtáárbuh äštih šoddâđ puátteevuođâst. Ton lasseen Brexit čuávumuššân Euroop union viehâdâh kiäppánij suulân 13 %. Brexit lii tovâttâm vädisvuođâid meiddei ovtâskâs EU enâmáid. Ovdâmerkkân ranskalij kuálásteijei iäláttâs lii tääl vaarâst hiäjusmuđ, tastko masa 30 % sii kyelisalâsist poođij Britannia kuálástemkuávluin.
Majemui koijâdâlmij mield stuárráámus uási ađai suullân kyehti kuálmádâs brittilijn láá tääl ton uáivilist, et Brexit lâi stuorrâ feilâ. Tuše kuálmádâs vala aneh tom šiev juurdân.
Käldee:
– From Brexit to Regrexit (www.npr.org)
Kove: Pete Linforth (Pixabay)