Saara Keskitalo lii kaččâm Suomâ ulâttâs huáppu­eestâ­kaččâmist

Almosvalastellee Saara Keskitalo kaačâi 100 meetter eestâkaččâmist uđđâ Suomâ ulâttâssân 12,64 jieht koskoho Lahti GP‑kištoin. Kaččâmist suu išedij 0,7 seekunt mietipieggâ. Ovdebáš Suomâ ulâttâs lâi Lotta Harala noomâst (12,65).

Ulâttâsâst ij lah nuuvtkin stuorrâ merhâšume Keskitalon.

– Jiem lah kuássin smiettâm ovtâskâs ääigi. Halijdâm tuše ain kaččâđ nuuvt jotelávt já porgâđ nuuvt pyereest ko máhđulâš. Pyereh ääigih šaddeh talle ton vuáđuld, Keskitalo muštâl.

Keskitalo čuávuvááh kištoh láá Kuortane GP‑kištoh kesimáánu 20. peeivi. Sun áigu uásálistiđ meid Euroop-miäštárvuotâ­kištoid, moh uárnejuvvojeh porgemáánust Birminghamist.

Euroop tääsist uđđâ ulâttâs pajedij Keskitalo niäljádin. Suu ovddiibeln láá Sveeici Ditaji Kambundji (12,62), Puola Pia Skrzyszowska (12,61) já Vuáládâhenâmij Nadine Visser (12,47).

Nisonij 100 meetter eestâkaččâm maailmulâttâs 12,12 kaačâi Nigeria Tobi Amusan ive 2022 MM‑kištoin.

Käldeeh:
– Saara Keskitalo juoksi Suomen ennätyksen ja lupaa vielä kovempiakin aikoja (www.hs.fi)
– Keskitalo juoksi loisteliaan SE-ajan: Yllätti kuinka paljon aika parani – Illukka 20,81 – Helander kolmas -Kotaja vireessä 100 metrillä (www.yleisurheilu.fi)

_{Artikkâlkove: SUL / Tero Teronen}