Ruátálâš stávránjuškejeijee já maaŋgâkiärdásâš maailmulâttâs haldâšeijee Armand Duplantis táppái olâttetteht jieijâs päikkikištoin Tukholma tiimaantliigast olssis hyenessiähá puátusáin 580, veik sun lopádâlâi uđđâ maailmulâttâs. Ovdil taam sun ij lam táppám ohtiigin suullân kuulmâ ihán. Duplantis kuođij aloduv 590 njuškiihánnáá, mut sun kočâttij puoh kulmâ irâttâs aloduvvâst 600.
Ruotâ almosradiofinnodâh SVT mield Duplantis lii vuáittám 40 kištod maŋaluvâi. Sun lii táppám ovdebáá tove syeinimáánust 2023. Talle sun paasij niäljádin Monacost tollum kištoost puátusáin 572.
Tääl Tukholma kišto vuoitij Kurtis Marschall puátusáin 590. Duplantis tááláš maailmulâttâs lii 631, mut sun tuubdâi, et sun pastaččij pyerediđ tom jieijâs päikkikištoost. Duplantis áánui keččein addâgâs hyenes puátusis. Sust lijjii vädisvuođah sanij kavnâmist. Keččeeh lohđuttii suu já čuorvuu sunjin kyeditmijd.
– Vuoi poškâ. Taat lii puoh tehelumos kišto munjin. Jiem mun halijdiččii táppáđ. Siämmáá ääigi mun lam forgâpalij najâmin. Mun perustâm tuše tast. Jiem pyevti leđe suttâm. Mun halijdâm áánnuđ addâgâs puohâin, kiäh pottii teehi. Mut mun lam najâmin. Mun tuáivum, et puohâin lii hävskis eehid já oholoppâ, Duplantis eeđâi.
Duplantis ij lah hejâidis keežild uásálistmin čuávuváá tiimaantliigan kesimáánu 10. peeivi Oslost.
Käldee:
– Armand Duplantis hävisi ensimmäistä kertaa lähes kolmeen vuoteen – pyysi anteeksi ja selitti häillään (yle.fi)
Kove: Frankie Fouganthin (Wikimedia Commons)