Sämitige saavâjođetteijee Pirita Näkkäläjärvi lii lamaš vaanhimijriijâst uđđâivemáánu 2025 rääjist. Ton ääigi nubbe värisaavâjođetteijee Tuomas Aslak Juuso lii toimâm saavâjođetteijee sajasâžžân.
– Mun halijdâm kijtteđ eromâšávt saavâjođetteijee sajasii Tuomas Aslak Juuso já vuossâmuu värisaavâjođetteijee Leo Aikio muu ovdâsvástádâsâi huolâmist ton puudâ ko mun lijjim meddâl. Kijttoseh meid ubâ Sämitige stiivrân tehálii pooliitlii pargoost jieškote-uvlágánij fádáiguin taan räi taan vaaljâpaajeest, Näkkäläjärvi iätá.
Näkkäläjärvi lâi vaanhimijriijâs ääigi mieldi muádi pargoääšist: uđđâ sämitiggelaavâ tuhhitmist ovdâskoddeest, president Alexander Stubb kolliimist Helsigist, sämmilij aalmugpeeivi tuáluin Anarist já europarlamentovdâsteijei teivâdmist Suáluičielgist. Tääl sun kuittâg aalgât pargo olesáigásâžžân.
– Mun maacâm mielâstân paargon vaanhimijriijâ maŋa. Vaanhimijrijjâ lii puáhtám uđđâ uáinuid elimân nuuvt olmožin, sämipolitikkárin ko meid jođetteijen, Näkkäläjärvi iätá.
Sämitiggeest láá joođoost ennuv teháliih pargoh
– Mun halijdâm mainâšiđ muáddi ääši, main láá eromâš pyereh máhđulâšvuođah pyerediđ sämmilij eellimtile Suomâst. Toh láá uđđâ sämitiggelaavâ ohtsâštoimâ- já ráđádâllâmkenigâsvuođâ (9 §) olášuttem, tuotâvuotâ- já sovâdâttâmkomissio tooimâi olášuttem já EU‑aašij ovdedem, Näkkäläjärvi iätá.
Sämitige tááláš vaaljâpaje juátkoo ive 2027 loopâ räi. Taan ääigi tuállojeh Suomâ ovdâskoddevaaljah cuáŋuimáánust 2027.
– Sämitigge lii ráhtádâtmin ovdâskoddevaaljáid já oovdedmin sämmiláid tehálijd aašijd vaaljâi ohtâvuođâst, saavâjođetteijee Näkkäläjärvi iätá.
Käldee: Sämitige tiäđáttâs
Kove: Renew Europe