Aalmugijkoskâsâš kirječälleeservi PEN International koččo algâaalmug- já ucceeblovokielâi sárnoid uásálistiđ videotihtâprojektân. Uásálistemravvuuh láá vuoluubeln. Majemuš uásálistempeivi lii 14.2.
Videotihtâproojeekt uárnejuvvoo aalmugijkoskâsii eenikielâ peeivi kunnen. Eenikielâ peeivi lii ovdedâm Unesco, já tot viättoo kuovâmáánu 21. peeivi. Taan peeivi rääjist PEN International ‑seervi Jurgâlem já kielâlij vuoigâdvuođâi toimâkodde (eŋg. Translation and Linguistic Rights Committee) almostit oovtâ videotiivtâ jyehi peeivi.
Majemui iivij proojeekt lii čáittám paijeel 250 tihtâd paijeel 140 kielân. Ovdebáid videoid puáhtá keččâđ toimâkode YouTube-tilist.
Taan ive proojeekt uárnejuvvoo kuuđâd keerdi. Toos láá puáttám tiivtah aainâs-uv jo kalaallisut-, tavesämi-, cree-, baski-, aromania-, wayuu-, khoikhoi-, bubi-, anindilyakwa- já selknamkielân.
Uásálistemravvuuh
- Kuvvii alnestâd 30–90 seekunt video, mast tun luuvah tiivtâ jieijâd kielân.
- Čääli tiivtâ já ton jurgâlus paldâluvâi tekstâtiätuvuárkán.
- Vuolgât videoliiŋkâ já tiätuvuárhá čujottâsân pen.tlrc@gmail.com.
Lasetiäđuh já uásálistem tärhibeh vátámušah kávnojeh PEN International siijđoin.
Kove: Pexels (Pixabay)