Suomâ Sämitigge juhloi uđđâ sämitiggelaavâ Anarist Säämi aalmugpeeivi 6.2.2026. Taažâ já Ruotâ Sämitigeh puohtii jieijâs tiervâttâs tilálâšvuotân. Taah sahâvuáruh tiäduttii ohtsijd háástuid já sämmilij vuoigâdvuođâi ovdedem merhâšume rasta rajij.
Suomâ täsivääldi president Alexander Stubb lâi vuolgâttâm tiervâttâs. Máttááttâsminister Anders Adlerkreutz toolâi sahâvuáru já siämmáánáál europarlamentikkár Anna-Maja Henriksson já vuoigâdvuotâministeriö demokratia- já almosvuoigâdvuotâuásáduv hovdâ Johanna Suurpää‑uv.
Sämitige saavâjođetteijee Pirita Näkkäläjärvi kiijtij sahâvuárustis Säämi aalmug já sämmilij ustevijd siđhesvuođâst já piäránaddelhánnáávuođâst. Sun tiäduttij, et sämitiggelaavâ uđâsmittem lii vaattâm ennuv naavcâid sämmilijn já et ubâ proosees lii lamaš mielâttes kukke, tastko tot lii pištám 30 ihheed. Sun ilodij tast, et kuhes pijne lii nuuhâm já et meid nuáđi laavâ uđâsmitmist lii meddâl čuávuváin suhâpuolvâin. Sun ana aalmugijkoskâsijd olmoošvuoigâdvuotâsopâmušâid kuávdáš äššin sämitiggelaavâ uđâsmitmist.
– Mij ep liččii taan tiileest, jis OA ij liččii adelâm Suomân muáittámušâid Sämitige vaaljâluvâttâllâm kuáttá. Suomâ staatâ ferttij porgâđ maidnii. Aalmugijkoskâsâš vuoigâdvuotâ já njuolgâdusvuáđusâš oornig láá uccâ aalmugij já enâmij toorjân, saavâjođetteijee Näkkäläjärvi muštottij.
Täsivääldi president Alexander Stubb ceelhij tiervâttâsâstis, et vuáđulaavâst nomâttum sämmilij eromâš sajattuvvâst huolâ anneem lii mii puohâi ohtsâš pargo. Sun tiäduttij, et uđđâ laavâ mield sämmilij jiešmeridemvuoigâdvuođâ olášuttem já sämikulttuur jiešiävtulii ovdedem puáhtá puátteevuođâst pyerebeht turvâstiđ.
– Sämitige toimâ lii merhâšittee uási sämmilij jiešhaldâšem já vuoigâdvuođâi turviimist. Sämitige já virgeomâhái savâstâllâm jotkuumist já sämmilij kulâmist kalga anneeđ huolâ puoh ohtsâškode taasijn meridem ohtâvuođâst, president joođhij.
Suomâ staatâ tiervâttâs juuhlán puovtij máttááttâsminister Anders Adlercreutz. Sun eeđâi, et ráđádâlmijn ij lah merhâšittee tuše tot, mii ceehijn lohá, pic tot, moin naalijn mij toimâp. Eromâšávt taat kuáská virgeomâhái já Sämitige koskâsii ohtsâšpargo- já ráđádâllâmvuovvijd.
Jieijâs tiervâttâs puovtij meid europarlamentikkár Anna-Maja Henriksson. Sun tooimâi ovdil vuoigâdvuotâministerin já lâi fáárust sämitiggelaavâ uđâsmitmist maaŋgâin vaaljâpoojijn. Sun juátká ohtsâšpargo sämmilijgijn tääl Euroop parlament jesânin.
Tiervâsvuođâ já pyereestvaijeem lágádâs (THL) hovdâ Mika Salminen ráđádâlâi sämmilij ovdâsteijeigijn sosiaal- já tiervâsvuotâkoččâmušâin. Kooveest sun lii oovtâst Sämitige sosiaal- já tiervâsvuotâčällein Riitta Lehtola-Kososáin.
Ehidispeeivi tilálâšvuođâst uárnejui val paaneelsavâstâllâm, mon moderistij Suvi West. Panelisteh muštâččii sämitiggelaavâ uđâsmittemproosees já jorgettii kejâstuv laavâ olášutmân. Anu Avaskari muštottij, et anarâšâi sajattâh ij lah val nuuvtkin nanos já et tom ferttee ain nonniđ.
Peeivi ääigi Aanaar markkânist lâi ennuv eres-uv ohjelm. Eereeb iärrás Aanaar servikodde ornij rukkoospuudâ kirhoost, já Säämi Söster lâi ornim servikoddetáálun piärgumáállás já lahcâkááhu kuossijd. Säämi Sösterist Inker-Anne Äärelä muštâl, et purâdeijeeh lijjii 112, já piärgumääli vuoššui 30 litterid.
Juhlepeeivi majemužžân numerin lâi Ulla Pirttijärvi & Ulda konsert Sajosist.
Koveh: Marja-Liisa Olthuis
Uuđâs tivvum 24.2.2026 tme 16.16: Meddâlistum puástutiätu piärgumáállás falâdeijest.