Ive 2026 tälviolympialiih uárnejuvvojeh Tave-Italia Milanost já Cortina d’Ampezzost kuovâmáánu 6.–22. peeivi. Motomij šlaajâi kištottâllâm aalgij kuittâg jo 4. já 5. peeivi.
Kištoi virgálâš lekkâmtilálâšvuotâ uárnejui jieht San Siro ‑stadionist Milanost. Suomâ liipu kuodij jieŋâskiärruspellee Mikko Lehtonen, kote spiällá ZSC Lions ‑juávhust Sveeici Zürichist. Pääihi alne láin meid Suomâ täsivääldi president Alexander Stubb já suu kálgu Suzanne Innes-Stubb. Lekkâmjuuhlij lasseen sunnuu ohjelmân kuulâi teivâdem Italia presidentáin Sergio Mattarellain Milano kunâgâslii palacist.
Suomâ olympiajuávkun kuleh 103 valastâlled ohtsis love šlaajâst: čierâstâllâm, freeski, jieŋâskiärru, luákkánjuškim, meccičuoigâm, muotâluávdástem, ovtâstum čuoigâm, pääččimčuoigâm, táiđuluistelem já tiäváčierâstâllâm. Suomâ virgálâš miitaalulme lii kuttâ miitaal.
Suomâst Yle vuolgât kištoid njuolgâ vuolgâttâssáin.
Koččâmušâst láá 25. tälviolympialiih já niäljádeh Italia ornim olympialiih. Ovdebááh olympiakištoh Italiast lijjii Torino tälviolympialiih 2006, Rooma kesiolympialiih 1960 já Cortina d’Ampezzo tälviolympialiih 1956.