Lovmat olmožid čokkânii čäälliđ anarâškielâlijd Wikipedia-artikkâlijd Helsigân ovdii Maria-pyecceiviäsu pajekiärdán juovlâmáánu 13.–14. peeivi. Nuorâmus pááján uásálistee lâi viiđâihásâš nieidâš. Fáárust lâi ulmui lasseen meiddei Astro-rooboot makkutmin uásálisteid. Tot ađđiistâlâi rooboot, tánssái já čuojâttij ovdâmerkkân Käärijä Cha cha cha -euroviisupitá já Kaj-lávlumjuávhu Bara bada bastu já maid peri tast jo táátui.
Pargopáájá ääigi uásálisteeh ovdedii Wikipedia maaŋgânáál. Sij čallii uđđâ artikkâlijd, tipšuu jo čallum artikkâlij kielâ, jurgâlii, tivvuu teknisijd aašijd, lasettii kuuvijd já käldeid já muttii myensterij saje. Ohtân pargon lâi meid peividiđ Wikipedia-tooimâi pargolisto. Juávhust savâstâllui meid ovtâskâs saanij kiävtust já merhâšuumeest.
Anarâškielâ Wikipedia sirdui láláttuvâst olmâ Wikipedian roovvâdmáánu 19. peeivi 2020, ađai tot lii eidu juhlom viiđâ ive šoddâmpeeivis. Toos láá tääl čallum pajeláhháá 6 500 artikkâlid, moh láá kuhebeh ollâ tääsi čalluuh. Wikipedia-juávkku tuáivu‑uv, et čalluuh kevttuuččii piäiválii elimist, ovdâmerkkân oppâmateriaalin já mudoi‑uv tiäđui ucâmân. Artikkâlijd puáhtá jieškote‑uv ain jieijâs intresij mield vijđediđ já lasettiđ.
Anarâškielâ Wikipediast lii lamaš iskosihe kalenderive 2025 ääigi. Anarâškielâ lii vuosmuš sämikielâ, mii lii uážžum jieijâs Wikimedia-kevtteejuávhu. Taat juávkku naanood uccâ já uhkevuálásii kielâ sajattuv digitaallii maailmist. Taan periood ääigi juávkku lii ornim kuttâ teivâdem, já jieškote-uv jeessân lii meid ohtuu porgâm Wikipediain. Periood maŋa Wikimedia-siäđus árvuštâl juávhu tooimâ já ton vaikuttâs siärvádâhân já kielâkuávlun. Jis juávkku lii toimâm pyereest, te talle taat juávkku šadda fastâ Wikimedia-kevtteejuávkkun, já tot puáhtá uuccâđ ruttâdem jieijâs ornim Wikipedia-tooimâi várás.
Käldeeh:
– Anarâškielâ siärvádâh lii uážžum Wikimedia-kevtteejuávhu ive kukkosii iskosááigán (www.anarasaavis.fi)
– Inari Saami Wikimedians User Group/Ive 2025 ihemuštâlus (meta.wikimedia.org)
Kove: Wikipedia-páájá