Duo Hildá Länsman & Tuomas Norvio lii iävtukkâssân Ive Etno 2025 ‑palhâšumán Emma-gaalast. Duo vuossâmuš skiärru ”Dajan” almostui ive 2025 aalgâst. Hildá Länsman já Tuomas Norvio lává porgâm oovtâst ive 2017 rääjist.
Keččeeh vist peesih jienâstiđ Emma-gaala Ive artist ‑kategoria vyeittest uđđâivemáánu 25. peeivi räi. Taan‑uv kategoriast Hildá Länsman & Tuomas Norvio lává iävtukkâssân.
Emma-gaala lii muusiksyergi stuárráámus tábáhtume Suomâst. Tot uárnejuvvoo njuhčâmáánu 7. peeivi 2026 Espoo Metro Areenast já vuolgâttuvvoo njuálguvuolgâttâssân Niäljáš-kanavast. Emma-palhâšumeh juáhhojeh paijeel 20 iävtukkâskategoriast.
Niillas Holmberg uđđâ kirje iävtukkâssân Runeberg-palhâšumán
Ucjuvlâš taaidâr Niillas Holmberg uđđâsumos kirje ”Naarattu” lii iävtukkâssân Runeberg-palhâšumán. Tihtâkirje, mon fáddán lii juhâsämmilâšvuotâ, almostui roovvâdmáánust.
Nelji ive tassaaš meid Holmberg vuossâmuš roomaan ”Halla Helle” lâi Runeberg-palhâšume iävtukkâssân, mut talle palhâšume vuoitij Quynh Tran kirje ”Skugga och svalka”.
Runeberg-palhâšume vyeittee almottuvvoo kuovâmáánu 5. peeivi Suomâ aalmuglâštihtâčällee Johan Ludvig Runeberg šoddâmpeeivi. Palhâšume lii juohhum ive 1987 rääjist. Tom jyehih Uusimaa-aavis, Porvoo kaavpug, Suomâ kirječälleelitto, Suomâ árvuštâllei litto já Suomâ ruátálâš kirječälleeservi.
Käldeeh:
– Niillas Holmberg ođđasamos girji evttohassan Runeberg-bálkkašupmái (yle.fi)
Kove: Riddu Riddu (Wikimedia Commons)