Luánduriggodâhkuávdáá vorâs raapoort mield kuálástem Aanaarjäävrist lii muttum ennuv majemui 15 ive ääigi. Čielgâ nubástussân lii kávpálii viermikuálástem lasanem já rijjâääigi viermikuálástem kiäppánem. Rijjâääigi kuálásteijeeh kuittâg ušteh váhá eenâb ko ovdil.
Kávpálij kuálásteijei saalâsmereh láá stuárrum. Taat kuáská sehe šapšáid, kuávžuráid, rávdoid, vuáskunáid já puškoid. Rijjâääigi kuálásteijeeh iä kode innig siämmáá ennuv šaapšâid, mutâ eres tehálij kuolij saalâsmeerijn iä lah stuorrâ nubástusah.
Aanaarjäävrist lii lamaš vyeimist kenigâsvuotâ kalveđ tiätu kuolijd jo ive 1976 rääjist. Kalvemkenigâsvuotâ kuáská šapšáid, kuávžuráid já rávdoid. Raapoort mield kalvemist láá hiäjus puátuseh. Ovdâmerkkân kolvum šaapšâi uási šaapšâ olessaalâsmeereest lii tuše love prosentid. Kuávžur já ráávdu kalvemijn ij oro lemin ohtâvuotâ saalâsmeerijd. Liijkás stuorrâ kalvemmereh sättih‑uv joba muokkiđ ekosysteem.
Nubben huolâstuttee nubástussân raapoort noomât tom, ete paskoheh láá šoddâm almolubbon. Toiguin kuálástem čuáccá nuorâbáid kuolijd, mii sáttá hiäjusmittiđ kyelinaalijd. Ovdâmerkkân kolvum kuávžurijn áárvu mield suulân 30 prosentid koddojeh vyelimittosâžžân.
Kuálmád riskâ lii vuásku‑ já puškonaalij lasanem, mon toovât eromâšávt šoŋŋâdâhnubástus.
Raapoort avžut tooimâid riiskâi haaldâšmân
Raapoort avžut raijiittâsâid paskohij kevttimân já viermij já uštemstáágui miärán, amas uccâ kuálááh kudduđ liijkás ennuv. Ton lasseen kalvemmeerijd kolgâččij smiettâđ uđđâsist. Vuáskunijd já puškoid vist kannattičij kuálástiđ puoh vuovijguin.
Käldee:
– Inarijärven kaupallinen kalastus kasvanut – istutusten tuotto heikko (www.luke.fi)
Kove: Valtteri Valkeapolku