Suomâ ij vuáittám mitalijd ive 2025 almosvalastâllâm MM-kištoin, moh uárnejuvvojii Tokiost čohčâmáánu 13.–21. peeivi. Tave-enâmijn tuše Ruotâ vuoitij mitalijd. Stuárráámuuh miitaalsalâseh lijjii Ovtâstum staatâin, Keniast já Kanadast. Taat lii čuákánkiäsu puoh mielâkiddiivumos tábáhtusâin koskoho 17.9. maŋa.
Tuorâstâh 18.9.
Alodâhnjuškejeijee Ella Junnila paasij puáttusttáá. Sun epiluhostui njuškiđ 183 cm lekkâmaloduvvâst. Maŋeláá čielgâi, ete njuhčâmáánust Junnila puállutäävtist lâi luovânâm uási.
Eveliina Määttänen ij peessâm jootkân 800 meetter kaččâmist.
Almai säittifinalist kištottâllui vuosmuu tove historjást syemmilijttáá. Kole vuoitij Trinidad já Tobago Keshorn Walcott (88,16 m), kiän ovdebáš aalmugijkoskâsij árvukištoi vuáittu lâi Lontoo olympialijn ive 2012. Siilbâ vuoitij Grenada Anderson Peters (87,38 m), proonsi vist Ovtâstum staatâi Curtis Thompson (86,67 m).
Botswana vuoitij vuosmuu almai MM-kollees kuássin ko Busang Collen Kebinatshipi kaačâi 400 meetterid aigijn 43,53. Trinidad já Tobago Jereem Richards vuoitij siilbâ já kaačâi meid eennâmsis uđđâ ulâttâs: 43,72. Botswana vuoitij vala proonsi, kaččen Bayapo Ndori (44,20).
Käldee: Yhdysvaltain tähtijuoksija 400 metrin voittoon järkyttävän kovalla ajalla – tässä kaikki torstain kisapäivästä (yle.fi)
Vástuppeivi 19.9.
Čiččâmvaldâleijee Saga Vannisii vuosmuš peivi ij moonnâm hirmâd pyereest. 100 meetter äiđikaččâm, alodâhnjuškim, kuulauigâdem já 200 meetter kaččâm maŋa sun lâi pááccám 93 čyegisid jieijâs ulâttâsâst. Ulâttâs šoodâi syeinimáánust Bergenist, kost Vanninen vuoitij vuálá 23-ihásij euroopmiäštárvuođâ.
Nisonij 200 meetter kaččâmist kole vuoitij Ovtâstum staatâi Melissa Jefferson-Wooden (21,68). Nubben poođij Stuorrâ-Britannia Amy Hunt (22,14), kuálmádin vist Jamaika Shericka Jakcson (22,18).
Nisonij 400 meetter äiđikaččâmist kollemiitaal moonâi Vuáládâhenâmij Femke Bolân (51,54). Silbâmiitaal finnij Ovtâstum staatâi Jasmine Jones (52,08). Proonsi vuoitij Slovakia Emma Zapletalová, kiän äigi 53,00 lii Slovakia uđđâ ulâttâs.
Käldee: 200 metrin mestari Noah Lyles: ”Rakastan esiintymistä” – tässä kaikki MM-Tokion perjantaista (yle.fi)
Lávurdâh 20.9.
Kuulauigâdeijeeh Emilia Kangas, Senja Mäkitörmä já Eveliina Rouvali iä peessâm finalân. Kangas puáđus 18,07 meetterid lii kuittâg Suomâ nisonij puoh pyeremus kuulauigâdem puáđus MM-kištoin.
Almai 20 kilomeetter väzzimist Veli-Matti Partanen poođij 25:in, Jerry Jokinen 37:in.
Vuáládâhenâmij Jessica Schilder vuoitij nisonij kuulauigâdem kole (20,29 m). Koččâmušâst lii Schilder vuossâmuš maailmmiäštárvuotâ já Vuáládâhenâmij vuossâmuš nisonij kieddišlaajâi MM-kolle. Silbâ mađhâšij Ovtâstum staatáid (Chase Jackson – 20,21 m), pronssi Uđđâ-Seelandân (Maddison-Lee Wesche – 20,06 m).
Saga Vanninen poođij čiččâmvaldâlmist čiččâdin (6 396 čyegisid). Taat lii Suomâ kuálmádin pyeremus saje čiččâmvaldâlem MM-kištoin. Ive 1991 Satu Ruotsalainen poođij niäljádin, já ive 1999 Tiia Hautala poođij viđâdin. Vanninen epiluhostui kukkodâhnjuškiimist, mutâ säittišlivgim moonâi pyereest, já 800 meetter kaččâmist sun pyeredij ulâttâsâs masa kuovttijn sekuntáin ááigán 2.09,33. Loppâloopâst Vanninen lâi pettâšum jieijâs puátusân.
Čiččâmvaldâlem miäštárin šoodâi Ovtâstum staatâi Anna Hall (6 888). Siilbân ulâttij Irland Kate O’Connor Irland uđđâ ulâttâssáin (6 714). Pronssi juohhui Ovtâstum staatâi Taliyah Brooks já Stuorrâ-Britannia Katarina Johnson-Thompson koskân (6 581).
Ecuadorân peivi lâi uáli jo historjálâš. Tot finnij vuosmuu MM-mitalis – kole – kieddišlaajâin. Kuássin ovdil kihheen ecuadorlijd ij lamaš peessâm ubâ finalân kieddišlaajâin. Eennâm sáŋgár lâi Juleisy Angulo, kiän säitti kiirdij nisonij nube šlivgimrieggest 65,12 meetterid. Puáđus lii meid Ecuador uđđâ ulâttâs. Siilbâ vuoitij Latvia Aneta Sietina (64,64 m) jieijâs ulâttâssáin. Pronssi moonâi Australia Mazkenzie Littlen (63,58 m).
Espanja María Pérez šoodâi nisonij 20 kilomeetter väzzim miäštárin (1.25.54,00). Lekkâmpeeivi 13.9. sun vuoitij meid 35 km väzzim. Sun lii áinoo väzzee, kote lii vuáittám kuohtuid maađhijd kuohtii maŋaluvâi, tastko sun vuoitij taid meid Budapestist 2023. Tokiost siilbân vaazâi Meksiko Alegna Gonzalez (1.26.06,00). Jaapaan finnij vuosmuu nisonij väzzim MM-mitalis ko Nanako Fuji poođij moolân kuálmádin (1.26.18,00).
Käldee: Kenian Emmanuel Wanyonyi 800 metrin kultaan hurjassa kiritaistossa – tässä kaikki MM-Tokion lauantaista (yle.fi)
Pasepeivi 21.9.
Almai 4 × 400 meetter viestâkaččâm kolle moonâi Botswanan (2.57,76). Botswana majemuš käččee Busang Collen Kebinatshipi, kote vuoitij tuorâstuv Botswana vuosmuu almai MM-kole, peesâi majemuu puudâst Ovtâstum staatâi (2.57,83) Rai Benjamin lappâd. Kuálmádin poođij Maadâ-Afrik (2.57,83) kyehti seekunt tuháttâs hitásubbon ko Ovtâstum staatah.
Nisonij 4 × 400 meetter viestâst Ovtâstum staatah vuoitij kole (3.16,61). Siilbâ vuoitij Jamaika (3.19,25), proonsi vist Vuáládâhenâmeh (3.20,18).
Almai lovevaldâlmist miäštárin šoodâi Saksa Leo Neugebauer (8 804 čyegisid). Puerto Rico Ayden Owens-Delerme vuoitij siilbâ (8 784), Ovtâstum staatâi Kyle Garland proonsi (8 703).
Arvaas pasepeeivi já kištoi majemuu peeivi uárnejui almai skiärrušlivgim. Ruotâ Daniel Ståhl šlivgij skiäru 70,47 meetterid já vuoitij kuálmád MM-kollees. Ilolâš vyeittee vuolgâttij tiervuođâid ubâ Suomâ aalmugân sehe Tuurkun Leila-ákkusis. Siilbâ šlivgij Liettua Mykolas Alekna (67,84 m). Samoa vuoitij vuosmuu MM-mitalis ko Alex Rose poođij kuálmádin (66,96 m).
Käldee: Daniel Ståhl heitti Ruotsille kolmannen mitalin, Suomi ja Norja nollille – katso täältä päätöspäivän tapahtumat (yle.fi)
Kove: RuinDig/Yuki Uchida (Wikimedia Commons)