Egyptliih antiikvirgeomâhááh almottii kuovâmáánu koskâmuddoost, ete egyptlij já britannialij arkeologij juávkku lii kavnâm faarao Thutmosis II tovláá häävdi. Virgeomâhái mield ovdebáš návt merhâšittee káávnus lâi faarao Tutankhamon hävdi, mon britannialâš arkeolog Howard Carter kaavnâi ive 1922. Thutmosis II lâi Tutankhamon madâreeči.
Hävdi kavnui Luxor kaavpug já Kunâgâsâi leevi viestârbeln. Häävdi siisâjoto já válduvázáttâh kávnojii jo ive 2022. Vistig totkeeh arvâlii, et hävdi kulâččij kiännii faarao káálgun, tastko kávnus alda láá faarao Thutmosis III káálgui hävdi sehe kunâgâtâr Hatšepsutân kullee hävdi. Hatšepsut lâi Thutmosis II kálgu já peliuábbi. Tutkâmušâid hettejii meiddei tot, et häävdist lâi tulvâm, sehe tot, et hävdi lâi masa kuárus. Totkeeh liijká kavnii motomijd littepittáid, main lijjii Thutmosis II já Hatšepsut noomah já eres tiäđuh. Toh čujotteh meid toos, ete Hatšepsut toimâttij kállás háávdánsivnedem. Tääl arkeologij ulmen lii selgâttiđ, kuus häävdi tiiŋgah láá tolvum.
Thutmosis II haldâšij Egypt suulân 3 500 ihheed tassaaš, 18. dynastia ääigi. Suu muumio kavnui ive 1881 Deir el-Bahri hävdikámárist, mii lii Niili viestârrido peln Luxor kaavpug alda. Thutmosis II kálgu Hatšepsut šoodâi faaraon forgâ kállás jäämmim maŋa. Hatšepsut lâi tovláá Egypt ohtâ härvis nissoonfaaraoin, já sun lii meid ohtâ váldálumosijn faaraoin. Sun ij lah hävdidum kállás alda orroo háávdán, peic mottoom kilomeetter kiäčán Kunâgâsâi liähán oovtâst ejijnis Thutmosis I:in. Kunâgâsâi leehi lii leehi, moos láá hävdidum maaŋgah uđđâ väldikode faaraoh já eres tovláá Egypt ollâárvusiih persovneh.
Käldeeh:
– Egyptissä löydettiin faarao Thutmosis II:n hauta (yle.fi)
– Last undiscovered tomb of Tutankhamun dynasty found (www.bbc.com)
– Egypt announces first discovery of pharaoh’s tomb in more than 100 years (www.reuters.com)
– Thutmose II’s tomb is Egypt’s biggest archaeological discovery since 1922 (www.aljazeera.com)
– Egypt announces first discovery of a royal tomb since King Tutankhamun’s was found over a century ago (www.cbsnews.com)
Kove: Francisco Anzola (Wikimedia Commons)