Euroviisui nubbe semifiinaal uárnejui tuorâstâheehid Wienist. Meiddei taan semifinalist jootkân pessii love enâmid. Sätioornigist almottum tiäđu mield jootkân pessii čuávuvááh enâmeh:
- Bulgaria (Dara – Bangaranga). Bulgaria moonnâm finalân lâi Suomâ já Vuáládâhenâmij selvâttâsâi mield vyerdittettee, tastko Bulgaria lávloo lii eennâm stuorrâ poptäsni. Eennâm lii tääl maccâm euroviisuid kuulmâ ive kooskâ maŋa. Säämi sohvájury árvuštâlâi taam, et lávlost lâi eromâš šiev jienâ.
- Ukraina (Leléka – Ridnym). Ukraina ij lah kuássin koččâm olgos finalist, nuuvt et taat-uv kišto nonnij historjá. Taat lii statistisávt eromâš. Taan tove Ukraina lavlust lâi euroviisui kuhemus nuottâ. Suomâ selvâtteijee Mikko Silvennoinen keejâi ääigi tiijmest já muštâlij, et tot piištij taan tove 26 sekuntid. Hárjuttâsâin tot lâi lamaš vala-uv kuhheeb.
- Taažâ (Jonas Lovv – Ya ya ya). Taažâ lávloo koolgâi vistig toohâđ pihtâsijdis maidnii, tastko toh lijjii ”meendu ávus myenstereh”. Taažân taat lii oovcád kerdi maŋaluvâi ko tot mana finalân. Säämi jury arvâlij: ”Ja ja ja!” Jonas Love pittáást urruu jury mield lemin uápis elementeh, mut pittá ij lam nuuvt viärráágin. Kiinii eeđâi: ”Lijkkuum liähtun já oovdânpyehtimân.”
- Australia (Delta Goodrem – Eclipse). Australia lávloo lii supertäsni, nuuvt et suu čoođâ moonnâm lâi vyerdittettee. Säämi jury smietâi, et lávlumân ij taarbâš muide ko lávloo já mikrofon.
- Romania (Alexandra Căpitănescu – Choke me). Säämi jury lijkkui eromâš ennuv fiijnâ lävdishown.
- Malta (Aidan – Bella). Pitá lávloo lii ohtâ eennâm pyeremuin lávloin. Malta ij lah kuássin vuáittám euroviisuid, mut tot lii lamaš neljii kuulmâ pyeremuu eennâm juávhust.
- Kypros (Antigon – Jalla). Tavesämikielâliih raatiliih kale smiettii, et maidsun pitá nommâ loppeed (anarâšk. jollâ). Taat onnui kuittâg suotâs muusikvideon.
- Albania (Alis – Nân). Albania lii olláám finalân koskâmiärálávt jyehi nube tove. Mottoom pahudij, et lávlost lii váhá kierdee jienâ.
- Tanska (Søren Torpegaard Lund – Før Vi Går Hjem). Tanska lii meid taan kišto ohtâ munejiellâhijn. Säämi jury lijkkui eromâš ennuv Tanska piitán. Suomâ čielgejeijee Mikko Silvennoisii mield lávlost lii vises oovdânpyehtee.
- Tsekki (Daniel Zizka – Crossroads). Säämi jury juávhust lijjii tyeji äššitobdeeh, já sii mielâst päiđi ij lam nuuvt pyereest korrum. Lávloo jienâ finnij eromâš kijttosijd.
Uárnejeijee-eennâm Nuorttâriijkâ sehe euroviisui stuorrâ ruttâdeijeeh Ranska já Stuorrâ-Britannia monnii njuolgist finalân. Ranska lávloo Monroe lii esken 17-ihásâš adai euroviisuhistorjá nuorâmus kištottâllee, já sust lii oskomettum jienâ. Tast ij kihheen puáhtám ettâđ nubenáál.
Finalist koččii olgos vittâ eennâm: Armenia (Simón – Paloma rumba), Azerbaidžan (Jiva – Just go), Latvia (Atvara – Ēnā), Luxemburg (Eva Marija – Mother Nature) já Sveicci (Veronica Fusaro – Alice).
Suomâ ij jienâstâm taan semifinalist, mut pivnohin šoodâi arvâliđ jootkân mannee iävtukkâsâid.
Fiinaal tuálloo lávvárduv tijme 22.
Käldee:
– Ennakkosuosikit Tanska ja Australia etenivät Euroviisujen finaaliin haastamaan Suomea – tässä kaikki illan kohokohdat (yle.fi)
Kove: MrSilesian (Wikimedia Commons)