Bulgaria Dara lii vuáittám euroviisuid 2026 Wienist pitáinis Bangaranga. Israel poođij kištoost nubben já Australia kuálmádin.
Vyeittee lâi puohháid olâttâs, tastko Bulgaria ij lamaš maggaargin jiellâh muneárvuštâlmijn. Taat lâi Bulgaria vuosmuš euroviisuvuáittu. Eennâm lâi lamaš kulmâ ive meddâl lávlumkištoin, já tääl tot maacâi vuod láávdán kievrâmuin poplávloinis.
Taan tove tuámárij čuággáh juáhášuvvii čuuvtij. Tuámmárjienâstmij maŋa Bulgariast lijjii 204 čuággád, Israelist 123 čuággád já Australiast 165 čuággád. Bulgaria lopâlâš čuággái meeri lâi 516, ko tot finnij 302 čuággád keččein. Israel lopâlâš čuággái meeri lâi 343 adai telejienâstmist tot finnij 220 čuággád. Australia finnij telejienâstmist 122 čuággád (lopâlâš čuággái meeri ohtsis 287 čuággád).
Taanihásijn euroviisuin maaŋgah pyereh euroviisuenâmeh paccii meddâl protestin toos, et EBU suovâi Israel uásálistiđ kiišton. Čuolmân lii Israel volliittem Gazan. Ollásávt kištoost paccii meddâl Espanja, Irland já Slovenia. Vuáládâhenâmeh já Island iävá uásálistám kiišton, mut toh liijká čaittijn euroviisuid televisiost. Mottoom tijme ovdil muusiktábáhtus älgim Wienist uárnejui stuorrâ mielâčááitus. Espanja radio-ovtâstume RTVE almostitij sosiaallii mediast ciälkkámuš fiinaal älgidijn: ”Euroviisuh láá kišto, mut olmoošvuoigâdvuođah iä lah taggaar. Peerusthánnáávuotân ij lah saje. Ráávhu já vuoigâdvuotâ Palestiinan.”
Taan tove euroviisuh selvâttuvvojii anarâš- já tavesämikielân Aanaar studiost. Mikkâl Morottaja selvâttij taid anarâškielân já Xia Torikka tavesämikielân.
Suomâ kuuđâd
Suomâ ovdâsteijei Pete Parkkosii já Linda Lampenius pittá Liekinheitin (Tullârussoo) lâi kuuđâd, mii lii siämmáš saje ko Suomâ ovdâsteijest Blind Channelist Rotterdamist 2021. Taat lii Suomâ kuálmádin pyeremus saje Lordi vuáitu maŋa kyehtlov ihheed tassaaš.
Suomâ pyeremus paje 2020-lovvoost lii lamaš äigipaje 2021–2023, kuás Suomâ lii olláám kuohtii love pyeremuu eennâm juávkun. Eromâš historjálâš lâi Käärijä nubbe saje ive 2023 pitáinis Cha-Cha-Cha. Suomâ čielgejeijee Mikko Silvennoinen muštâlij jieijâs čielgiimist, et love ihheed tassaaš Suomâ ij lamaš vala ollágin mielâkiddiivâš eennâm euroviisuin, mut taan määđhi lii ferttim huksiđ.
Suomâ lâi ovdil keččeejienâstem viđâdin, já tast lijjii talle 141 čuággád. Telejienâstmist Suomâ finnij 138 čuággád, nuuvt et ohtsis Suomâ finnij 279 čuággád. Love enâmist tuámáreh iä adelâm Suomân ollágin čuággáid. Taah enâmeh lijjii Albania, Azerbaidžan, Bulgaria, Italia, Kreikka, Moldova, Puola, Romania, Serbia já Sveicci. Keevâtlávt nollá merhâšij tom, et koččâmušâst leijee enâmist Suomâ ij peessâm jienâstmist love pyeremuu eennâm juávkun.
Suomâ vuolgij euroviisuid muneárvuštâlmij mield kievrâmussân vyeitteeiävtukkâssân jyehi statistiik mield. Suomâ laavlâ moonâi eromâš pyereest, mut čuággáh iä pijsám vuáitun. Suomâ keččeeh kale tuoivuu vuáitu eromâš ennuv, tastko Lordi vuáitust láá kuullâm jo kyehtlov ihheed.
Käldeeh:
– Yle (suomâkielâ já sämikielah) já NPO1 (hollandkielâ) Eurovisio-seelvâtmeh
– Bangaranga! Bulgarije wint Eurovisie Songfestival voor het eerst, Israël tweede (nos.nl)
Kove: EBU / Alma Bengtson