Suomâ euroviisuovdâsteijeekyevtis Pete Parkkonen já Linda Lampenius lává ovdánâm finalân, mii tuálloo lávvárduv Wienist. Suomâ väljejui finalân nubben enâmin love eennâm juávhust.
Suomâ lasseen finalist lávluh Kreikka, Belgia, Ruotâ, Moldova, Israel, Serbia, Kroatia, Liettua já Puola. Meid enâmij valjim ovdánij taan oornigist.
Kievrâmussân vyeitteeiävtukkâssân finalist lává Suomâ já Kreikka.
Anarâš aavis čuávui tv‑vuolgâttâsâid maaŋgâ enâmist simultaanlávt. Vuáládâhenâmij tv‑selvâtteijeeh vuordijn Moldovan já Israelân ennuv čuággáid kuldâleijei jienâstmist. Sunnuu mielâst Liettua já Puola láin vookaallávt kievrah, já taat jiešvuotâ luoštij kuohtuid enâmijd finalân. Suomâ pitá maŋa saahâ jorgettij tiäđust-uv Käärijän já Cha-Cha-Chan, mii lii toohâm stuorrâ vaiguttâs Euroopân. Já Israelist selvâtteijeeh pahudáin, et tot finnee ain kuldâleijein ennuv jienâid.
”Sämikielâg jury”
Ovdebái ivij meid semifinaleh láá selvâttum sämikielân, mut taan ive tuš fiinaal selvâttuvvoo. Sämikielâgeh liijká halijdeh kuullâđ reaalääigist, mon mielâst ulmuuh láá euroviisupittáin. Nuuvtpa koskâfiinaaleehid vuáđudui smavvâ Facebook-juáhuš, mii árvuštâlâi jyehi pitá.
Taat smavvâ ”Sämikielâg jury” áigu juátkiđ árvuštâlmis meid tuorâstuv koskâfinalist.
Finalân moonnâm pittáin arvâlui eereeb iärrás näävt:
Moldovast arvâlui, et tast lâi komálâš laavlâ, mut liijká ulmuuh toos lijkkojeh. Ohtâ ij iberdâm tom, mondiet tot lii munejiellâh.
Ruotâ lavlust arvâlui, et pittá ij tarvanâm piälján. Mottoom mielâst tot lâi aaibâs pyeri. Kiinii ij lijkkum toos ollágin.
Kroatia pittáást ettui, et tot lâi vuáimálâš já pyeri.
Kreika laavlâ onnui humoristlâžžân stijlâsiävuttâssân, mii viggá siävuttiđ málásân Käärijä, Baby Lasagna já Joost Klein Europapa, mut tast ij šoodâ nuuvtkin njaalgâ määli.
Italia pittáást possuu nostalgisiih piegah, já pittá onnui karismaatlâžžân.
Suomâ pittá lâi pyeri, mut liijká jiellâh oroi lemin Tanska.
Puohah iä čaahâm finalân
Finalist olgos paccii Portugal, Georgia, Montenegro, Eestieennâm já San Marino.
Vuáládâhenâmij selvâtteijeeh pahudáin, et Portugal laavlâ lii uccâ lavluš, mii piergee pyereest páihálijn kähviviistijn mut ij nuuvtkin euroviisui finalist.
Georgia lávlookyevtis láin vuáittám junioreuroviisuid, já tääl suoi láin stuorrâ euroviisuin enâmis ovdâsteijeeh váhá siämmáálágánáin pittáin. Vuáládâhenâmij selvâtteijeeh arvâláin, et taat lävkki lii vissâ meendu styeres sunnui. Sämikielâg juryst peelgih monnii vuálos já arvâlui, et taat ij lah fiinaalpittá.
Montenegro lávloo pääiđi siäpulâs lâi tego raavgâst, mut taat ij vaarâ lah vaikuttâm sii fiinaalsajan. Pittá ij pozettâm magarijdgin stuorrâ tobdoid.
Eestieennâm vuolgâttij taan tove kištoid lavluu Too epic to be true. Sämikielâg jury omâttâlâi tom, mondiet eennâm vuolgât tággáár pitá já lávloo, ko pyerebeh‑uv vissásávt liččii. Vuáládâhenâmij selvâtteijeeh láin eidu teivâm Eestieennâm tijmáá ovdâsteijee Tommy Cash jieijâs hotellist, já suoi smietâdáin jiänusân, et áigu-uvsun Cash vuod lávluđ tijmáá pitá Espresso macchiato. Tot lâi peljimáátu ko verdid taanihásii piitán.
San Marino piitán Sämikielâg jury lijkkui kale já árvuštâlâi tom nostalgisâžžân, já tot meid lijkkui pyellee láávdán.
Nubbe semifiinaal uárnejuvvoo tuorâstuv
Tuorâstuv semifinalist lávluh 18 enâmid čuávuváá oornigist:
Bulgaria
Dara – Bangaranga
Azerbaidžan
Jiva – Just Go
Romania
Alexandra Căpitănescu – Choke Me
Luxemburg
Eva Marija – Mother Nature
Tsekki
Daniel Žižka – Crossroads
Ranska
Monroe – Regarde!
Armenia
Simón – Paloma Rumba
Sveicci
Veronica Fusaro – Alice
Kypros
Antigoni – Jalla
Nuorttâriijkâ
Cosmó – Tanzschein
Latvia
Atvara – Ēnā
Tanska
Søren Torpegaard Lund – Før vi går hjem
Australia
Delta Goodrem – Eclipse
Ukraina
Leléka – Ridnym
Britannia
Look Mum No Computer – Eins, Zwei, Drei
Albania
Alis – Nân
Malta
Aidan – Bella
Taažâ
Jonas Lovv – Ya ya ya