Arto Maaninen, kote lii porgâm rehtor virgeest ive aalgâ rääjist, áigu uásálistiđ persovnlávt ohtsâškodálii savâstâlmân, mut suu mielâst pooliitlij sahâvuárui äigi ij lah tääl val.
Majebaargâ 21.1.2025 Oulu ollâopâttuv Linnanmaa kampusist Oulu ollâopâttuv oovdeb rehtor Jouko Niinimäki adelij uđđâ rehtorân Arto Maanisâžân rehtor vääldi tobdomeerhâid: čevesalvân, ärdeepihtâs já liipu.
Maaninen iätá, et ollâopâttuv merhâšume ohtsâškodálâžžân tuáimen lii tuođâi styeres já et Oulu ollâopâttuvâst lii ennuv merhâšume kuávlu eellimvyeimi já kištonaavcâi tááhust.
– Mii tutkâmtiäđuin šaddeh hutkoseh, moh pyeremuu tiileest išedeh mii kuávlu irâttâsâid piergiđ pyerebeht kištottâlmist, iätá Maaninen.
Uđđâ rehtor áigu meid persovnlávt uásálistiđ ohtsâškodálii savâstâlmân. Čuávuváá ohhoost sust lii ollâopâttuv stiivrâ čuákkim, kost savâstâlloo, maid ollâopâttâh áigu porgâđ puáttee ääigi.
– Ton maŋa puáhtá ettâđ tärhibeht, mii lii mielâst. Tääl ij vala pyevti toollâđ pooliitlijd sahâvuáruid, iätá Maaninen.
Oulu ollâopâttuv uáppeekode stiivrâ jesâneh vyerdih positiivlávt uđđâ rehtor toimâpaje.
– Mij vyerdip, et ohtsâšpargo eromâšávt uáppeigijn naanoosm vala-uv eenâb já et mij pyehtip juátkiđ ávus savâstâllâmkulttuur, iätá uáppeekode saavâjođetteijee Vilma Sippola.
Tilálâšvuođâst Sippola pajedij sahâvuárustis Oulu uáppeekode tubdâlduv Fiat Lux. Tot meerhâš ”Puáđus čuovvâdvuotâ”, já tot lii čallum rehtor ärdeepihtâsân.
– Tot čuujoot čuovviittâspaargon, mon sehe ollâopâttâh já uáppeekodde tevdih, iätá Sippola.
Uáppeekode stiivrâ jeessân Tiina-Kaisa Nikkinen vuárdá uđđâ rehtorist ávus já maaŋgâpiälálii viestâdem.
Nubbe uáppeekode stiivrâ jeessân Aprotim Paul vuárdá eenâb ohtâsâšpargo ollâopâttuv haldâttuv já uáppei kooskâst. Sun tiäddut jieijâs kommentist tom, maht ollâopâttâh uáinoo aalmugijkoskâsávt. Sun tuáivu tom eenâb puáttee ääigist já kiävttá Ovtâstum staatâi politiikist uápis eđâlduv meid taan ohtâvuođâst:
– ”Make Oulu Great Again” kolgâččij leđe mii motto čuávuvái viiđâ ive ääigi, iätá Paul.
Sara Keränen
Käldee:
– Oulun yliopiston uusi rehtori sai rehtorin vallan tunnusmerkit eli käädyt, viitan ja lipun (yle.fi)
Kove: Sara Keränen