Šleđgâ háálbui ive 2024, ko tom verdid ihán 2023, muštâl energiavirgetoimâttâh. Šleeđgâ oleshadde – moos kuleh šleđgâenergia, sirdem já viäruh – uccánij koskâmiärálávt 6,6 prooseent tálutuáloid almolávt já 6,8 prooseent šleđgáin liegâdeijee ulmuid. Nuuvtpa šleđgâreekkig lâi koskâmiärálávt 75 eurod (tálutuáluh) já 210 eurod (šleđgáin liegâdeijeeh) ucceeb ive 2024 ko ive 2023. Šleeđgâ hadde lii Suomâst tääl suullân siämmáá tääsist ko ovdil koronaääigi já energiakriisâ. EU já Taažâ kuávlust Suomâ šleđgâenergia hadde lii kuálmádin hälbimus, mut sirdemhoodij já viärui maŋa oleshadde lii tuše váhá ucceeb ko EU koskâárvu.
Suijân häälbib šleeđgân lijjii hälbibeh pörssihadeh já uđđâ, hälbibáid šleđgâsopâmuššáid sirduumeh. Ive 2024 uđđâ, tuáistáážân vyeimistorroo šleđgâsopâmušâi vuáládâshadeh lijjii 20,5 % hälbibeh tálutuáloid já 16,2 % hälbibeh šleđgáin liegâdeijee ulmuid ko ive 2023. Uđđâ, kyevti ive meriáigásiih sopâmušah vist lijjii váhá vááijuv prooseent (tálutuáluh) já 6,3 prooseent (šleđgáin liegâdeijeeh) hälbibeh. Kuittâg šleeđgâ sirdemhadeh pajanii koskâmiärálávt váhá paijeel 2 prooseent, mii hiäjusmitij ucánjáhháá šleeđgâ hálbum.
Valjaas mulsâšuddâm já negatiivliih hadeh
Šleeđgâ hade mulsâšuddâm lii kiävrum. Taat puátá tast, et pieggâvyeimi puovtâd ain stuárráb uási Suomâ šleeđgâst. Ive 2023 pieggâvyeimi uási lâi 18 %, já ive 2024 tot lâi jo 25 %. Pieggiis tijme hadde lii vyeligâš já piegâttes tijme hadde vist aaleeb. Meiddei ovdâmerkkân kuhes kolmâ pajeh sehe poođhah šleđgâpuovtâdâsâst tovâtteh mulsâšuddâm. Suomâst hade mulsâšuddâm lii stuárráámus EU:st, já tot juátkoo puátteevuođâst-uv.
Pieggâvyeimi jotelis šoddâm tiet meiddei negatiivlij hoodij uási lii lasanâm uáli jo ennuv. Šleeđgâ hadde lâi Suomâst negatiivlâš vuosmuu keerdi ive 2020. Negatiivliih teikâ 0-haddasiih tijmeh lijjii 536 ive 2023 já 900 ive 2024. Taat meerhâš tom, et moonnâm ive kulâtteijee maavsij jyehi lovváád tijme šleeđgâst tuše sirdemmáávsu. Negatiivlij tijmij meeri-uv lii Suomâst stuárráámus ubâ EU:st. Puátteevuođâst meeri kuittâg uccániš, ko paijeelpásulii šleeđgâ vuorkkim puárrán.
Päikkieennâmlii šleeđgâst 93 % puovtâduvvoo uđâsmuvvee energiakäldeiguin já aatoomvuoimijn. Šleđgâpuovtâdâs toovvât ain ucceeb čiđđâdioksidluoštuid: ive 2024 luoštuuh lijjii 25 % ucebeh ko ive 2023 já 70 % ucebeh ko ive 2019.
Tijmeest vaartân
Tááláá ääigi pörssišleeđgâ hadde mitteduvvoo tijme kooskâi. Kesimáánu 12. peeivi rääjist tot mitteduvvoo kuittâg vaartâ kooskâi. Nubástus tyehin lii ovdâmerkkân pieggâ- já piäivášvyeimi mulsâšuddâm, maid varttâhaddadâllâm pasta čuávudiđ pyerebeht. Nubástus kuáská ubâ EU:n.
Suomâ energiasyergi servi Energiateollisuus ry njunošäššitobdee Riina Heinimäki iätá, et puátteevuođâst šleđgâvyebdeeh ferttejeh faallâđ kulâtteijeid varttâhaddesopâmušâid. Suu mield táálááh sopâmušah, main iättoo, et haddadâllâm ain čuávud Suomâ kuávlu spot-hade, sirdâšuveh automaatlávt varttâhaadan. Jis sopâmušâst sárnoo eidu tijmehaddeest, te tot vist ij sirdâšuččii, jis ij šleđgâvyebdee almoot, et návt tábáhtuvá.
Nubástus uáinoo meiddei šleđgâmittárijn: toh ferttejeh pasteđ registeristiđ kulâttem vaartâ kooskâi. Tááláá ääigi Suomâst tuše peeli mittárijn pasteh taas. Puoh mittáreh ferttejeh leđe mulsum teikâ peividum majemustáá ive 2028 loopâst. Mittárijn huolâttem lii šleđgâviermiservâsij ovdâsvástádâssân. Jis mittár registerist kulâttem tuše tijme kooskâi, te jyehi tijme kulâttem juáhhoo táásá neljijn varttáin.
Käldeeh:
– Kotitalouksien sähkölasku pieneni lähes seitsemän prosenttia vuonna 2024 (energiavirasto.fi)
– Energiavuosi 2024 – Sähkö (energia.fi)
– Sähkölasku halpeni viime vuonna keskimäärin 75 euroa – lisäksi oli kuukauden verran päiviä, jolloin sähkö ei maksanut mitään (yle.fi)
– Varttisähkön tulo lähestyy – kysyimme kuinka se vaikuttaa sähkösopimuksiin (yle.fi)
Kove: Valtteri Valkeapolku