Käähvi hadde paijaan ain. New York pöörsist käähvi hadde juuvsâi alemuu tääsis masaba viđâlov ihán. Ive 1977 maŋa käähvi ij lah kuássin lamaš nuuvt tiivrâs ko tääl. Käähvi maailmmarkkânhadde noteristoo ruánáákäähvipöörsijn. Maailm kyehti tehelumos käähvipöörsi láá sajaidittum New Yorkân já Lontoon. New York pörssi noterist arabiakäähvi já Lontoo kongokäähvi.
Taan ive arabiakäähvipáávuh tivruu čuuvtij. Taat käähvipáápusorttâ kiävttoo páávuin puoh enâmustáá, masaba 70 prosentid. Čohčâmáánust käähvipáávuh lijjii tivrom taan ive masaba 40 prosentid.
Käähvi koijâdem lassaan, mut puátteevuođâst šoŋŋâdâhnubástus puáhtá stuorrâ háástuid toos, láá-uv käähvipáávuh finnimnáál.
Taan ive Brasiliast láá lamaš korrâ koškáduvah, moh láá lamaš viärráábeh ko ovdil, ađai ubâ šaddovalje lii uhke vyelni tuššâđ. Brasilia lii maailm stuárráámus käähvipáávui puovtâdeijee, mondiet puohah paleh käähvi puovtâdem kiäppánmist puáttee ive.
Häälbib käähvisorttâ ađai kongokäähvi lii meid vädisvuođâin Vietnamist. Koškáduvah já rášuarveh láá tovâttâm vädisvuođâid käähvi viljâlmân.
”Mij mäksip eenâb hyeneeb käähvist”, iätá Massimo Battaglia NOS-uđđâsáid italialii Accademia del caffè espressost, mii iššeed käähviviljâleijeid nubelágán šoŋŋâdâhân heivitmist. ”Käähvist šadda čappâdub já riččâsub, já tast lii eenâb kofeiin. Taggaar lii talle puátteevuođâ käähvi.”
Käähvi hadde meriduvvoo koijâdem já fáálu peht. Ruánáákäähvi fáálu lii kiddâ puovtâdem meereest. Eennâmtuálu puovtâdemmeerijd vaigutteh ovdâmerkkân šaddoeennâm kvaliteet, šaddotaavdah já šooŋah. Ovdâmerkkân koškáduvah hettejeh käähvimuorjij šoddâm toin naalijn, et toh sättih pääcciđ miestui, kuškâđ teikâ koččâđ miestust, já talle toi kvaliteet ij lah innig siämmáá pyeri. Jis käähvipáávuh fállojeh ucceeb, te talle käähvi hadde pöörsist táválávt paijaan. Eidusâš käähvikavpâšem tábáhtuvá njuolgist vyebdee já uástee kooskâst toin naalijn, et pörssihadde tuáimá avžuuttum hadden.
Sáttá kuittâg leđe, et käähvi liijká kulá ulmui elimân, ton haddeest huolâhánnáá.
Käldeeh:
– Koffieprijs stijgt verder, hoogste niveau sinds 1977 (nos.nl)
– We staan voor een wereldwijde koffiecrisis, zeggen experts (nos.nl)
Kove: Chris (Pixabay)