Purrâmâškálvutuálvum árvu pajanij aldasáid kyevti miljardân ive 2024. Pajanem lii masa kuttâ prooseent. Siämmást purrâmâškáálvui pyehtim pajanij aldasáid nelji prooseent, já tot lii tääl paijeel 5,9 miljard eurod. Tuálvum já pyehtim koskâsâš vuálápáácu stuárui ucánjáhháá. Tiäđuh kávnojeh Luánduriggodâhkuávdáá vorâs tiäđáttâsâst.
Suomâst tuálvojeh ain puoh enâmustáá mielkkipyevtittâsah. Moonnâm ive toh tuálvojii 491 miljovn euro verd. Aalmugijkoskâsii tääsist eromâšávt vuojâ kojâldâh lii lasanâm.
Valjesoortâin haavvâr tuálvoo eenâb ko kuássin ovdil. Suomâst tot kiävttoo suullân 200 miljovn kiilud. Luánduriggodâhkuávdáá eromâštotkee Csaba Jansik mield vooljij olesšaddo lii taan ive ušom váhá ucceeb, mutâ päikkieennâm valje rijttáá kuittâg pyereest, já ton hadde piso täsivin.
Kusâpiärgu kevttui eenâb, mutâ syergi ovdánem Suomâst lii hiäjub ko Euroopist mudoi. Šavepiärgu päikkieennâmlâš kojâldâh kiäppánij, mutâ tuálvum tuárju puovtâdâs.
Šaddovistekuurkah tuálvojii ennuv eromâšávt Baltian. Moonnâm ive Latvian tuálvojii kuurkah paijeel kyehti miljovn kiilud. Puoh päikkieennâmliih tomatteh vist kiävttojeh Suomâst.
Ive 2024 purrâmâškáálvuh tuálvojii Suomâst enâmustáá Ruotân (24,5 %), Eestienâmân (10,9 %) já Saaksan (7,5 %). Stuárráámuuh purrâmâškáálvui pyehtimenâmeh vist lijjii Saksa (15,0 %), Ruotâ (12,2 %) já Vuáládâhenâmeh (11,2 %).
Käldeeh:
– Maa- ja elintarviketalouden suhdannekatsaus 2025: Suomalainen ruokavienti myötätuulessa (www.luke.fi)
– Elintarvikeviennin arvo kasvoi viime vuonna (yle.fi)
Kove: Jarosław Bialik (Pixabay)