Uđđâ-Seeland lii meridâm pajediđ tuuriistviärus korrâsávt. Tääl tuuriistmáksu lii 35 Uđđâ-Seeland dollarid (suullân 20 eurod), mut roovvâdmáánu 1. peeivi rääjist hadde allaan 100 dollarân (suullân 56 eurod). Tuuriistmáávsu ferttejeh mäksiđ stuorrâ uási turistijn sehe motomeh uáppeeh já pargeeh, kiäh puátih Uđđâ-Seelandân. Australialiih já stuorrâ uási Kuálhismeerâ enâmij aalmugjesânijn vuod iä taarbâš mäksiđ tuuriistviäru. Meiddei Uđđâ-Seeland tuuriistviisumij hadeh pajaneh roovvâdmáánu aalgâst.
Uđđâ-Seeland esivääldi mield tuuriistviäru aledem suijân lii tot, ete enâmist eelih jyehi ive ain eenâb turisteh. Tuuriistviäru ruuđah kiävttojeh infrastruktuur paijeentolâmân já huolâtmân sehe luándusuoijâlmân.
Uđđâ-Seeland lii tobdos maaŋgâpiälásii luándustis. Moonnâm ive Uđđâ-Seelandist ellii paijeel 3,2 miljovn turistid. Aalmugijkoskâsii maađhâšmist lii stuorrâ roolâ Uđđâ-Seeland ekonomiast. Tuuriistviäru valdui anon enâmist ive 2019.
Käldeeh:
– Uusi-Seelanti triplaa turistiveron – vierailu maksaa viitisenkymppiä (yle.fi)
– Tourist levy to enter New Zealand to be hiked by nearly 200% (www.nzherald.co.nz)
– New Zealand to nearly triple tourist tax for international visitors (www.theguardian.com)
Kove: Krzysztof Golik (Wikimedia Commons)