Moonnâm ohhoost Oulust uárnejuvvojii maŋgâ tilálâšvuođâ anarâškielâst.
Majebaargâ 10.3.
Oulu ollâopâttuv anarâškielâ lehtor Marja-Liisa Olthuis toolâi luvâlduv fáádást ”Totken, toimâtteijen já kirječällen anarâškielâg siärváduvâst”. Tast sun muštâlij jieijâs pargoost anarâškielân já anarâškielâ pyerrin. Luvâldâh lâi uási Giellagas kulttuurráiđu 2026 ‑ohjelmist.
Koskoho 11.3.
Oulu kuávdáškirjerááju Saarist uárnejui anarâškielâ kirjálâšvuođâ eehid. Meiddei taan tábáhtusâst luvâldâllen lâi Marja-Liisa Olthuis. Sun toolâi vuáđulii oovdânpyehtim, mast sun lâi juáhám anarâškielâlii kirjálâšvuođâ kuuđâ uásán: puáris klassikkáreh (meid oskoldâhlâš kirjálâšvuotâ), eellimkeerdih, fiktio, antologiah, tiivtah já kukkâseh sehe kielâpiervâlij várás pyevtittum kirjálâšvuotâ.
Olthuis lasseen jienân pessii iäráseh-uv. Ollâopâttâhmáttáátteijee já kirječällee Petter Morottaja, kote lii čáállám vuosmuid anarâškielâlijd fantasiakiirjijd, muštâlij jieijâs čäällimpargoost.
– Siskáldâs já uccâ juávkkuteedâ siärvus tááhust piejâi čäälliđ kirje, Morottaja västidij ko sust koijâdui, mondiet sust lâi ”pággu čäälliđ”. – Ain lii nuuvt, et jis tun halijdah maidnii anarâškielân, te poorgâ tom jieš.
Säämi Kielâkäldee anarâškielâ rävvejeijee Jukka Mettovaara faalâi kuldâleijeid suomâkielân jurgâlum pittáid anarâškielâlii kirjálâšvuođâst, tego Anja Kaarret tiivtâ Njuhčâmáánu sehe váldus Matti Morottaja toimâttem Sigá maainâs ‑kirjeest. Mettovaara muštâlij meid eestieennâmlii Mehis Heinsaar čäällim Hiärrá Paavvâl äigikirjeh ‑kirje jurgâlmist.
Eehid loopâbeln lâi rijjâ savâstâllâm anarâškielâ kirjálii syergist vijđásubbooht-uv, eereeb iärrás Wikipediast já Anarâš aavisist. Aavis västideijee toimâtteijee Valtteri Valkeapolku muštâlij aavis tooimâst.
Ehidân uásálistii muáddilov olmožid.
Tuorâstuv já vástuppeeivi 12.–13.3.
Anarâškielâ servi ornij ive vuosmuu Wikipedia-páájá. Kyevtpiäivásii pááján uásálistii puoh pyeremuu puudâ čiččâm olmožid. Páájá ääigi anarâškielâlâš Wikipedia ovdánij maaŋgânáál: šoddii uđđâ artikkâleh (om. vielgissipulist já Alexander Stubbist) já luokah, puáris artikkâleh (om. antiikáigásii Kreikkaast) tievâsmittojii já tivvojii, já Wikipedia teknisâš peeli peividui.
Anarâškielâlii Wikipediast láá tääl 6 526 artikkâlid.
Jyelgih liegâsin anarâškielâ tuárjumáin
Oho ääigi lâi máhđulâš uástiđ Elsa Väisäsii kođđeem ullosuhháid, moi puáhtuseh kiävttojeh anarâškielâ kirjálâšvuođâ pyerrin. Ivnáás já lieggâ suháh vuábdojii-uv maŋgâlov paarrâd. Nelji paarâ paccii vala vyebdihánnáá.
Artikkâlkove: Valtteri Valkeapolku