Suomâ ovdâsteijee Nette Kiviranta lii vuáittám siilbâ nisonij kiälkkáčierâstâllei puáibildmist Milano–Cortina paralympialijn. 24‑ihásii Kivirantan miitaal lii vuosmuš paralympialijn. Siämmást taat miitaal lii historjálâš ubâ Suomâ alppâčuoigâmân: tot lii Suomân esken kuálmád juksum miitaal alppâčuoigâmijn paralympialijn. Kivirantast šoodâi meid vuosmuš syemmilâš nissoon, kote lii vuáittám paralympiamiitaal taan šlaajâst, sehe vuosmuš syemmilâš kiälkkáčierâstâllee, kote lii vuáittám miitaal paralympialijn.
Kiviranta lâi kievrâ jo vuosmuu čierâstmist, já sun pisoi alda njunnooš meid nube čierâstmist. Suu ohtsâšäigin puáibildmist šoodâi 1.27,96, mii puovtij sunjin silbâmiitaal alppâčuoigâm majemuu šlaajâst. Kiina Wenjing Zhang vuoitij kole aigijn 1.27,69.
Ovdil taan kišto Kiviranta lâi niäljád stuorrâpuáibildmist. Tääl puáibildmân uásálistij meid nubbe syemmilâš, Maiju Laurila, kote poođij ohtnubálovádin.
Paralympiadebytantân siilbâ vyeittim pajedij stuorrâ tobdoid. Kiviranta čielgij, et stuárráámuuh tobdoh pottii tállân molâvijve maŋa, ko sun iberdij, et sun lâi vuáittám miitaal.
Kiviranta miitaal lii Suomân jo nubbe silbâ Milano–Cortina paralympialijn: moonnâm koskoho Inkki Inola vuoitij siilbâ uáinimvádulij love kilomeetter čuoigâmist.
Käldee:
– Milano-Cortina 2026: Nette Kivirannalle historiallista hopeaa pujottelussa – Maiju Laurila päätöskisassaan 11. (www.paraurheilu.fi)
Kove: Harri Kapustamäki / KIHU