Syemmilâš čyeigee Inkki Inola lii vuáittám siilbâ love kilomeetter ärbivuáválii čuoigâm koskâäigivuolgâkištoost koskoho Milano–Cortinast. Inola, 27, kištottâl uáinimvádulij NS3-luokkaast. Suu uápisteijeečyeigen lii Reetu Inkilä. Suoi kiergâttáin čuoigâmmäđhistis ääigist 29.52,3. Kole vuoitij Ovtâstum staatâi kištottâllee Jake Adicoff. Inola paasij sust 1.48,7. Ruotâ Zebastian Modin poođij kuálmádin. Inkki Inola miitaal lii vuosmuš uáinimvádulii syemmilii čyeigee paralympiamiitaal kyevtlovneelji ihán.
Paralympialij uáinimvádduluokah
- NS1: čalmettes valastâlleeh
- NS2: eromâš hyeneeht uáinee valastâlleeh
- NS3: hyeneeht uáinee valastâlleeh
Inkki Inola uáiná epitärkkilávt 2–3 meetter kiäčán. NS3-luokkaast uápisteijee ij lah págulâš, mutâ Inola mielâst tast lii stuorrâ ävkki. Uápisteijee Reetu Inkilä váldupargon lii tieđettiđ Inola olâtteijee aašijn já išediđ suu toollâđ korrâ liävtu älkkeebijn soojijn, eromâšávt miätáluvâin.
Inola vuolgij taan kiišton ohtân potentiaallâžžân mitalistin, veik lâi vyerdimist, et sáttu ličij koorâs majebaargâ ärbivuáválii spriintist mitalijd tuálvum Jake Adicoff, Kiina Shuang Yu já Zebastian Modin tiet. Čuoigâmist Inola pisottâlâi kuhháá Ukraina Dmyto Suiarko tyehin niäljádin. Loppâloopâst sun piiđij já kuođij tuáhásis puohâid iärásijd, eereeb kole vuáittám Adicoff.
Dramaatlâšvuotâgin ij Inola kištoost váilum, tastko sust toijui čuoigâmsuábbi vuosmuu mohheest. Sun kuittâg finnij jotelávt uđđâ suábi jieijâs išečyeigest já peesâi lonottiđ suábis vuosmuu vuástáluvâst. Inola lii kijttevâš, et suu niärváh killájii pyereest taan päärtist já et sun peesâi juátkiđ čuoigâmis.
Meid vuosmuu tove Inolain čuoigâm uápisteijee Reetu Inkilä lâi tutâvâš sehe čuoigâmân já puátusân:
– Kaartâi kal uáli ennuv porgâđ ton oovdân, et Inkki pisoi čuoigâmin muu tyehin tain älkkees pittáin, Inkist lâi nuuvt korrâ saaveeh. Hävski lii leđe Inkkijn kištottâlmin. Iä lah nuuvt hirmâd hyenes puátuseh puáttám ton maŋa ko muoi čuoigâškuođijm oovtâst.
Inkki Inola muštâl, et suu miänástume tyehin ij lam mihheen eromâšijd, pic et miänástus lii kuhesáigásii pargo puáđus, ko puoh pittááh heivejii pyereest oohtân.
Inola kištottâlâi majebaargâ spriintist já koočâi olgos jo semifinalijn. Tijmá sun vuoitij MM‑proonsi sehe spriintist já 10 kilomeetter kištoost.
Käldeeh:
– Milano-Cortina 2026: Inkki Inola hopealle maastohiihdon 10 kilometrin perinteisellä – ”Fantastinen tunne” (www.paraurheilu.fi)
– Inkki Ilola voitti paralympiahopeaa! (www.iltalehti.fi)
– Inkki Inolan sumuinen tie kohti paralympiamitalia (yle.fi)
Kove: Harri Kapustamäki / KIHU