Aalmugjienâstemaalgâ, mii vuástálist Kiemâjäävri pumppuvyeimilájádâsproojeekt, mana kietâdâlmân Kiemâjäävri kaavpugstiivrân. Aalgâ uážui 288 vuáláčallud.
Kemijoki Oy halijdičij huksiđ pumppuvyeimilájádâs Kiemâjáávrán Áilegtuoddâr kuávlun. Lájádâs tijppâ ličij pumpputurbiin, já ton vuáimálâšvuotâ ličij 550 megawattid. Pirâstovâlduvâi čielgiittâsâi karttim algâttui cuáŋuimáánust 2024, já tot sessiistuvvoo uđđâivemáánust 2025.
Kiemâjäävri kaavpugstivrâ kietâdâl aalmugjienâstemalguu ive vuossâmuu čuákkimist kuovâmáánust. Aalmugjienâstem ličij raavâadeleijee. Alguu almostitij Sirpa Iivari, kote áásá Kiemâjäävrist rijjâäigistis. Sun vuolgâttij alguu kieldân ko tast lijjii tuárvi noomah uđđâivemáánu 14. peeivi. Kiemâjäävri lii lamaš tulvâdem čuosâttahhân jo maŋgâlov ihheed, já maaŋgah ässeeh láá huolâstum. Čäsuáivi alodâh muttoo joba čiččâm meetterid. Taat lii hyenes äšši kuolijd já jäävri eres elleid sehe ubâ ekosysteemân jäävrist já jäävri riddoin.
Kulttuurärbi kieđâvuššui meid pumppuvyeimilájádâsääšist. Kiemâjäävri kuávlust láá ennuv sämikulttuur pasâttâsah já sämmilâš kulttuurärbi, moh iä lah kärttejum. Ovdâmerkkân maaŋgah uhreläähjih kávnojeh Tiermesnjaargâst. Meid puáris já pase Áilegtuoddâr killááččij ennuv. Ärbitiäđu mieldi kiemâsämmiliih uhredii Áilegjäävri riddoost já Áilegtuoddârist. Muorâsieidih kávnojeh Áilegjuuvâst Pasekiävŋá paaldâst. Ubâ taat kulttuurärbi sáttá lappuđ, jis pumppuvyeimilájádâsproojeekt olášuvá. Niko Rytilahti luvâldâlâi Kiemâjäävri sämmilii kulttuuräärbist 11.1.2025.
Kuávlu lii tehálâš meid Kiemâjäävri tááláid orroid. Sij ovdâmerkkân kuálásteh já kuáđutteh poccuid tobbeen.
Samuli Anttila
Käldeeh:
– Pumppuvoimaloita vastustava kansanäänestysaloite etenee Kemijärven kaupunginvaltuustoon – Aloitteeseen kertyi 288 nimeä (www.kotilappi.fi)
– Pumppuvoimalaitokselle ei nouse peukkua kalastajien ja paliskuntien keskuudessa – ”Jos raa’asti puhutaan, se on menetetty järvi” (www.kotilappi.fi)
– Pumppuvoimalan vastustajat taistelevat Kemijärvellä kotirantansa ja luonnonkauneuden puolesta (www.kotilappi.fi)
– Ailangantunturin pumppuvesivoimalan yva-selvitykset etenevät Kemijärvellä (www.kotilappi.fi)
Kove: Q0ywo (Wikimedia Commons)