Jo paijeel čyeti valastâlled, kiäh ožžuu moonnâm ive Pariisi olympialijn tâi paralympialijn pronssimiitaal, láá macâttâm mitalis. Návt muštâl ranskalâš sijđo La Lettre. Suijân toos lii tot, ete veeškist, siiŋkist já taaneest rahtum pronssimitaleh láá ruástuškuáttám.
Jyehi olympiamiitaal 2024 siskeeld Eiffel-toornâst nurrum skuottâmeetaal. Kollemitalijn lii ucemustáá kuttâ graamâ 24 kaaraat kollepiddedâs, loppâ lii silbâ. Silbâmitaleh láá rahtum siilbâst.
Vuossâmuuh valastâlleeh vaidâlii miitaalstis jo olympiakištoi ääigi. Aalmugijkoskâsâš olympiakomitea lii lopedâm valastâlleid uđđâ pronssimitalijd ruástum mitalij sajan.
Olympiamitalij valmâšteijee, ruttâpáájá Monnaie de Paris, lii váldám ovdâsvástádâs hyenesšlaajâg mitalijn. Ruttâpáájá valmâštij Pariisi olympialij já paralympialij várás 5 084 mitalid.
”Mij lep váldám tile tuođâst jo vuossâmui vaidâlusâi rääjist porgemáánust. Tastmaŋa irâttâs lii pyeredâm mitalij valmâštemproosees. Monnaie de Paris molso puoh vahadum mitalijd uđđâ mitaláid valastâllee táttumist taan ive vuossâmuu niäljádâs ääigi”, kommentistij ruttâpáájá uđâstoimâttâhân AP:n.
Käldee:
– Jo yli 100 urheilijaa on palauttanut Pariisin olympiamitalinsa – Kansainvälinen olympiakomitea lupaa uudet tilalle (yle.fi)
Kove: AlSepPhoenix (Wikimedia Commons)