Čevđikäärdih historján -aalmuglâšáánnum luovâttui ovdâskoodán vuossaargâ čohčâmáánu 9. peeivi. Aalmuglâšáánnum, mon ulmen lii lopâttiđ čevđiellei kärdidem Suomâst, uážui meriääigi räi 102 561 nanodum vuáláčálusid. 50 000 vuáláčálusid, moh váttojeh ääši kieđâvušmân ovdâskoddeest, lijjii čuákist vuálá pirrâmpeeivist. Aalmuglâšáánnum luovâttii ovdâskoodán Tiina Vuolle, Pavel Tahkovuori, Elisa Aaltola, Eeva Ylimäki já Jemina Fallenius. Čuákkimohtâduv hovdâ Antti Linna vaaldij tom vuástá.
Ánumist iävtuttuvvoo, et čevđipyevtittem loopâtmân rahtuuččij aalmuglâš vuávám, mon mield čevđikäärdih sirduuččii kuáhtulii sirdumääigi maŋa historján. Ton lasseen syergi pargeeh uážuččii torjuu eres suorgijd sirduumân.
Čevđiráhtulâšvuođâst lii jo kuhháá savâstâllum ton eettisij čuolmâi tiet. Stuorrâ uásist eurooplijn enâmijn tot lii-uv kieldum tâi nuuhâm, já meid stuorrâ uási syemmilijn tuárjuh čevđikärdidem kiäldu. Moonnâm ive tohhum koijâdâllâmtutkâmuš mield 83 prosentid syemmilijn vuástálisteh tááláá čevđikärdidem. Aalmuglâšáánnum kampanjakoodinator Tiina Vuolle iätá, et meid eenâbloho ovdâskode aalmugovdâsteijein almottii ovdil ovdâskoddevaaljâi, et sij tuárjuh čevđikärdidem kiäldu.
Ellei killáámušâi lasseen lii savâstâllum syergi vaikuttâsâst ulmui tiervâsvuotân ton maŋa ko loddeinfluenssa njuámui čevđielleid maaŋgâ käärdist Suomâst moonnâm ive. Meid ekonomia piäjá smiettâđ: čevđikäärdih láá finnim Suomâ staatâst taan ive jo masa 37 miljovn eurod sajanmáávsuid loddeinfluenssa tiet, veikkâ syergist maŋgâ finnoduv lii restâlum jo kuhháá ovdil loddeinfluenssa puáttim. Sajanmáávsuh per loddeinfluenssan jáámmám tâi loddeinfluenssa tiet kuddum ellee láá ton lasseen lamaš čuuvtij alebeh ko tot, maid čevđikäärdih liččii uážžum ellee čeevđi vyebdimist.
Lávurduv čohčâmáánu 14. peeivi uárnejuvvojeh mielâčáittuseh čevđikärdidem vuástá maaŋgâin kaavpugijn pirrâ Suomâ. Uáivitábáhtume álgá Helsigist tijme 14 Ryevdirađetorist. Ton lasseen toorjâtábáhtumeh tuállojeh siämmáá ääigi Kouvolast, Kuopiost, Tamperest, Tuurkust, Oulust já Ruávinjaargâst.
Käldeeh:
– Kansalaisaloite turkistarhauksen lakkauttamiseksi luovutettiin eduskunnalle (www.eduskunta.fi)
– Kansalaisaloite turkistarhauksen kieltämiseksi eduskunnalle – keräsi tarvittavat kannatusilmoitukset päivässä (www.mtvuutiset.fi)
– Turkistarhoille maksettu tänä vuonna jo lähes 37 miljoonaa euroa korvauksia (animaliamedia.fi)
– Turkistarhaus historiaan -tukimielenosoitukset (animaliamedia.fi)
Kove: Oikeutta eläimille (flickr)