Aalmuglâšáánnum rakettij pääččimkiäldust Suomâst lii uážžum paijeel 50 000 vuáláčálusid já tienuuvt ovdán ovdâskoodán. Aalmuglâšáánnum rahtui esken moonnâm ive majemuu peeivi, ađai vuáláčáluseh, moh váttojeh ääši kieđâvušmân ovdâskoddeest, lijjii čuákist muádi peeivist. Vuáláčálusij nuurrâm kuittâg juátkoo ain.
Ánumist váttoo, et hiärvástâllâmpavkkânâsâi valmâštem, enâmânpyehtim, vyebdim já kevttim kielduččii ubâ Suomâst. Kiäldu ulmen lii suojâliđ ulmui tiervâsvuođâ já torvolâšvuođâ, kepidiđ pirâshááituid já turvâstiđ ellei pyereestvaijeem.
Ánumist mainâšuvvoo meid, ete maaŋgah Euroop enâmeh láá čovgim hiärvástâllâmpavkkânâsâi kevttim tâi valmâštem. Ovdâmerkkân Vuáládâhenâmijn rakettij skappum já pääččim lii kieldum táválijn ulmuin ive 2026 rääjist. Meiddei Irlandist hiärvástâllâmpavkkânâsâi uástim, vyebdim, omâstem já pääččim sierâ lovettáá lii rikos.
Jo ive 2019 aalmuglâšáánnum hiärvástâllâmpavkkânâsâi vyebdimkiäldust eres ulmuid ko áámmátláid ovdánij Suomâ ovdâskode kieđâvušmân. Taat áánnum finnij paijeel 65 000 vuáláčálusid. Loppâloopâst aalmuglâšáánnum kuittâg hilgui ive 2022.
Käldeeh:
– Ilotulitteiden kieltoa vaativa kansalaisaloite etenee eduskuntaan (yle.fi)
– Kansalaisaloite ilotulitusten kieltämiseksi saavutti riittävän määrän allekirjoituksia muutamassa päivässä (www.ts.fi)
Kove: Gerd Altmann / geralt (Pixabay)