Aalmuglâšáánnum, mon ulmen lii lopâttiđ čevđiellei kärdidem Suomâst, lii uážžum paijeel 50 000 vuáláčálusid. Toi nuurrâm piištij vuálá pirrâmpeeivi, tastko áánnum almostui kansalaisaloite.fi-siijđon eskin vuossaargâ 4.9.2023. Aalmuglâšáánnum ovdán tienuuvt Suomâ ovdâskoodán.
Aalmuglâšáánnum mield čevđiráhtulâšvuotâ lii moonnâmääigi syergi, mii toovvât killáámuš elleid, já tot lii meid riskâ ulmui tiervâsvuotân. Ton lasseen ton merhâšume Suomâ ekonomian lii ucce. Ánumist iävtuttuvvoo, et čevđipyevtittem loopâtmân rahtuuččij aalmuglâš vuávám, mon mield čevđikäärdih sirduuččii kuáhtulii sirdumääigi maŋa historján. Syergi pargeeh uážuččii torjuu eres suorgijd sirduumân.
Čevđiráhtulâšvuođâst lii jo kuhháá savâstâllum ton eettisij čuolmâi tiet. Stuorrâ uásist eurooplijn enâmijn tot lii-uv kieldum tâi nuuhâm. Fur Free Europe -aalmuglâšáánnum, mon ulmen lii lopâttiđ čevđiellei kärdidem ubâ Euroopist, lâi uážžum paijeel 1,5 miljovn vuáláčálusid njuhčâmáánu 2023 räi, já tot lii luovâttum ovdâskulij EU komission. Ekonomiatutkâmuš koijâdâlmij mield meiddei 80 prosentid syemmilijn vuástálisteh tááláá čevđiellei kärdidem.
Ellei killáámuš lasseen majemui aaigij lii savâstâllum meid syergi vaikuttâsâst ulmui tiervâsvuotân. Loddeinfluenssa lii njuámmum čevđielleid maaŋgâ käärdist Suomâst, já ton čuávumuššân 120 000 čevđielled láá lopâttum taan räi. Purrâmuštoimâttâh áigu tärhistiđ Suomâ puoh 400 čevđikärdid loddeinfluenssa várás čoovčâ ääigi. Loddeinfluenssa puáhtá muttuđ ulmuid varâlâžžân, jis virus vistig leevvân mottoom eres njomâtteijeešlaajâ siste jeđe luhostuvá muttuđ nuuvt, ete tot njuámu ulmuid já talle leevvân meid olmooškode siste.
Käldeeh:
– Ruokavirasto valmistelee jälleen uutta turkiseläinten lopetuspäätöstä (yle.fi)
– Turkistarhauksen kieltämistä vaativa kansalaisaloite etenee eduskuntaan (yle.fi)
– Ruokavirasto aikoo tarkistaa kaikki Suomen turkistarhat lintuinfluenssan varalta (yle.fi)
Kove: Adam Białasik (Pixabay)