Euroop parlament savâstâlâi roovvâdmáánu nube tievâsčuákkimohhoost Fur Free Europe (Čevđirijjâ Euroop) ‑aalmuglâšalgâttâsâst. Taat algâttâs váátá ubâ EU vijđosii čevđitarhamkiäldu já čevđejum ellei čeevđij já čeevđijd siskeldeijee puovtâdmij pyehtimkiäldu EU markkânáid. Algâttâs láá čáállám vuálá 1,5 miljovn olmožid vuálá 10 mánuppaajeest, mii čáittá kievrâ torjuu čevđitarham kieldimân EU-aalmugijn. Meiddei stuorrâ uási sahâvuáru toollâm MEPijn vattii čevđitarham kieldim já algâttâs tuárjum.
Čevđirijjâ Euroop ‑algâttâs lii jo kieđâvuššum komissio ornim kuullâmtilálâšvuođâst sehe AGRI-, IMCO- já PETI-váljukudij almolii kuullâmtilálâšvuođâst. AGRI lii eennâmtuálu já eennâmkuávlu ovdedem váljukodde, já tast láá kyehti syemmilii jeessân: Elsi Katainen (Renew Europe, Kuávdášpiäládâh) já Petri Sarvamaa (EPP, Kokoomus). Sismarkkân- já kulâtteijeesyejiváljukoddeest IMCOst iä lah syemmiliih jesâneh, iäge lah iävtuttâslävdikoddeestkin (PETI).
Komissio kalga adeliđ aalmuglâšaalgâtmân kirjálii vástádâsâs ovdil ive loopâ. Taan vástádâsâst komissio iävtut máhđulijd tooimâid vuáđuštâlmijgijn.
16 EU jeessânenâmist čevđitarham lii jo kieldum, mut ovdâmerkkân Suomâst návt ij vala lah. Sirpa Pietikäinen čáálá tiäđáttâsâstis, et čevđitarham lii epieettisâšvuođâ lasseen ekonomisávt kannatmettum, já tondiet syergi ekonomisâš tuárjum ij lah kyedittettee. Čevđitarhaameh tovâtteh meid riiskâid aalmugtiervâsvuotân, tego vuottui meid koronavirus leevvânmist Tanska miŋkkitarhain. Meiddei Suomâst loddeinfluenssa lii njuámmum maŋgáid čevđitarhamsoojijd, ige luánduvárásij ludij koddem čevđitarhai loddeinfluenssatábáhtusâi keežild lah rievtis ige jiärmálâš čuávdus áášán.
Aalmuglâšalgâttâs lohtâs nanosávt meid jo ovdebáá End of Cage Age ‑aalmuglâšalgâttâsân, mii váátá hekkišoddâdem kieldim EU:st.
Euroop komissio lii Sirpa Pietikäisii mield lopedâm ellei pyereestvaijeemdirektiiv jo maaŋgâid iivijd. Kuittâg oovdânpyehtim ellei pyereestpiergimlaavâst vala-uv váilu esken almostum komissio pargo-ohjelmist, já ton finnim ain vana. Sirpa Pietikäinen čáálá, et komissio kolgâččij toollâđ lopádâsâs já tot kolgâččij kunnijâttiđ aalmugässei tuoivuid.
Käldeeh:
– Fur free Europe -kansalaisaloite (www.sirpapietikainen.net)
– Parlamentin valiokuntien kokoonpano vahvistettiin (www.sttinfo.fi)
Kove: mcruetten (Pixabay)