Nato njunoščällee Jens Stoltenberg lii kolliistâlmin Ruotâst. Stoltenberg já Ruotâ njunošminister Ulf Kristersson tooláin tieđettemtilálâšvuođâ, mon ääigi kieđâvuššojii Nuorttâmeerâ torvolâšvuotâ, Bryssel terrortaho já Ruotâ Nato-jeessânvuotâ.
Stoltenberg ilodij Tuurkist puáttám uđđâsijn: Ruotâ Nato-ucâmuš ovdán eennâm parlament ratifisistmân.
Stoltenberg tuáivu, et Ruotâ ličij forgâpalij Nato tievâsjeessân. Kuábáškin sunnust ij kuittâg halijdâm adeliđ täärhib äigitaavlu jeessânproosees ovdánmân.
Meid Uŋgar kalga vala ratifisistiđ Ruotâ Nato-jeessânvuođâ ovdilgo Ruotâst šadda tievâsjeessân. Lii vyerdimist, et Uŋgar čuávu Tuurki tooimâid. Uŋgar lii ovdil almottâm, et tot ij haalijd leđe majemužžân ratifisistmin Ruotâ jeessânvuođâ.
Tieđettemtilálâšvuođâ maŋa Uŋgarist poođij almolâš kommentistem Ruotâ jeessânvuođâ ratifisistmist. Reuters mield Uŋgar olgominister Péter Szijjártó muštâl, et sun lii savâstâllâm turkkilij kollegaidiskijn já iätá, et Uŋgar taha suvereenlii miärádâs Ruotâ jeessânvuođâ háárán.
– Ruotâ Nato-jeessânvuotân kyeskee lahâoovdânpyehtim kyeđđim Tuurki parlamentân ratifisistem várás tuálvu Tuurki tohon, kost mij lep lamaš jo maaŋgâid mánuppoojijd, minister eeđâi já čujottij Uŋgar iävtuttâsân, mii lii vuárdám parlamentist moonnâm ive rääjist.
Ruotâ Nato-kiäinu láá hiđásmittám Tuurki já Ruotâ sierâuáivileh kurdikoččâmušâst já Kooraan puáldimist. Uŋgar aagah hiđes kieđâvuššâmäigitaavlun iä lah čielgâseh. Njunošminister Viktor Orbán lii kuittâg čielgâsávt almottâm, et sun ij uáini, mondiet aššijn ličij huáppu, iäge Ruotâst lah magarehkin torvolâšvuođâ uhkeh.
Ruotâst kolliistâlmis ääigi Stoltenberg uásálist Nato-foorumân. Ton lasseen sun tiäivá njunošminister Kristersson lasseen Ruotâ piäluštâsministeráin, olgoministeráin já parlament sahâalmain.
Käldee:
– Näin Stoltenberg kommentoi Ruotsin Nato-aikataulua – Unkari älähti (www.iltalehti.fi)
Kove: brightfreak (Pixabay)