Moonnâm oho majebaargâ almottuvvojii taan ive iävtukkâsah Tave-enâmij rääđi muusikpalhâšumán. Ive 2026 iävtukkâssân láá 13 nuottâtyeijid ohtsis 15 nuotâsteijest pirrâ Tave-enâmij. Tuojij šlaajah láá maaŋgâlágáneh: elleekovemuusikist ruánááeennâmlii elektronlii muusikân. Iävtukkâssân lii meiddei tanskalii nuotâsteijee Jeppe Ernst tyeji Solo (Cantus II), mast iä lah jienah ollágin.
Jyehi Tave-eennâm uážžu asâttiđ kyehti iävtukkâs. Ton lasseen Färsuolluuh, Ruánááeennâm já Åland uážžuh asâttiđ oovtâ iävtukkâs. Veikkâ Säämist ij lah máhđulâšvuotâ iävtuttiđ kiämmán, taan ive fáárust láá kuittâg kyehti pajekielâg nuottâtyeje: Suomâ nubben iävtukkâssân lii Hildá Länsman já Tuomas Norvio vuosâalbum Dajan, Ruotâ nubben iävtukkâssân vist Britta Byström ooppera Eatnama váibmu.
Ive 2025 almostum Dajan lii Hildá Länsman já Tuomas Norvio vuossâmuš ohtâsâš album. Länsman já Norvio pittáin ovtâstuveh tavesämmilâš juoigâmärbivyehi já elektronlâš jienâenâdâh. Tain šoodâi aaibâs jiešlágán, eklektlâš (sierâ stiijlâin vaiguttâsâid ovtâstittee) šlaajâ. Länsman já Norvio lává jieš muštâlâm, ete sunnuu skiärru lii oovtmanolâš savâstâllâm ärbivyevi já teknologia kooskâst, ulmuu já maašin kooskâst sehe eennâm já šleeđgâ kooskâst.
Ruátálâš nuotâsteijee Britta Byström lii ráhtám maailm vuossâmuu pajekielâg ooppera Eatnama váibmu oovtâst tavesämmilijn kirje- já čaaitâlmčällein Rawdna Carita Eirain. Ooppera lii stivrim tavesämmilâš nuotâsteijee já stivrejeijee Elle Márjá Eira. Maailm vuosâeehid lâi skammâmáánu 15. peeivi 2025 Ruotâ kunâgâslii oopperast Tukholmast.
Tave-enâmij rääđi muusikpalhâšume juáhhoo jyehi nube ive artistân teikkâ artistjuávkun já jyehi nube ive kiännii nuotâsteijee nuottâtuáján. Taan ive muusikpalhâšume vyeittee almottuvvoo roovvâdmáánu 20. peeivi Helsigist. Vyeittee finnee palhâšumepáccá já 300 000 Tanska ruvnâd (suullân 40 000 eurod).
Puoh iävtukkâsah
- Färsuolluuh
- Eli Tausen á Lava – let me cry
- Island
- Bergrún Snæbjörnsdóttir – Intraloper
- Ingibjörg Turchi – Stropha
- Ruánááeennâm
- Varna Marianne Nielsen – Sila
- Ruotâ
- Britta Byström – Eatnama Váibmu
- Per ”Texas” Johansson – Den sämsta lösningen av alla
- Suomâ
- Hildá Länsman & Tuomas Norvio – Dajan
- Sauli Zinovjev – Maailman kantaja
- Taažâ
- Ola Kvernberg – Flåklypa – fra Paris til pyramidene
- Kristine Tjøgersen ja Benedicte Maurseth – Elja
- Tanska
- Guldimund – Jeg venter i lyset
- Jeppe Ernst – Solo (Cantus II)
- Åland
- Havsmörker – Ilväder
Tuámmárkode vuáđustâsâid jyehi iävtukkâsâst puáhtá luuhâđ Norden.org siijđoin.
Kimberli Mäkäräinen
Käldee:
– Tässä ovat Pohjoismaiden neuvoston musiikkipalkinnon ehdokkaat 2026 (www.norden.org/fi)
Kove: Norden.org