Olympialij lekkâmjuhleh láá onne, vástuppeeivi. Taah láá vuosmuuh kesiolympialiih 12 ihán Euroopist. Meiddei Suomâ president Alexander Stubb lii mađhâšâm kálguinis Susanne Innes-Stubbáin čuávvuđ olympialijd.
Aalmugijkoskâsii olympiakomitea (AOK) mield čyeđeh tuhátteh liipuh láá ain vyebdimnáál. Iänááš liipuh láá vyebdimnáál resale-saajeest: ulmuuh láá maŋgâ mánuppaje tassaaš uástám liipuid já láá tääl vyebdimin taid virgálij kiäinui mield.
Meiddei pivnohis tábáhtussáid tego almai čyeđe meetter finalân láá vala liipuh finnimnáál. Hälbimuuh liipuh vyelgih fáárun 295 euroin, ko vist tivrâsumosijn ferttee mäksiđ joba 1 000 eurod. Meiddei eres tábáhtuumijd tego hockeyn, suhâmân já kietâpáálun láá hälbis liipuh finnimnáál joba viiđáinluvvijn euroin. Meiddei jyelgipálluspelláid, moh spiällojeh Pariisi ulguubeln, lii ennuv saje.
Organisaatio ij lah huolâst vuobdum liipui meereest. Ton mield lipui vyebdim lii taan räi luhostum eromâš pyereest já meiddei olympialij ääigi vuábdojeh ain liipuh.
Pariisi hooteelsuárgán olympialiih oroh lemin čuolmâ: ijjâsajeh iä lah tievâ. Tot, kote tijmá taan ääigi iiskâi väridiđ hooteelviste olympialij ááigán, ferttij mäksiđ ijjâsajestis uáli jo sálttáás hade. Tääl hadeh láá njeeijâm. Maaŋgâs oroh eidu velttimin Pariisi čuávuvái kyevti oho ääigi stuorrâ olmoošhivvâduvâi keežild. Maaŋgâs oroh meid monâmin tuše peivimookán Pariisin, ađai sij iä keevti páihálijd ijjâsoojijd ollágin.
Tutkâmeh čäittih, et hotelleh iä lah ubâ 80 prosentidgin väridum. Maaŋgah Pariisi hotelleh láá tääl vyeledâm hodijdis, já toh tuáivuh kyessin vala majemuu muddoost värideijeid.
Pariisi olympialiih pišteh pajeláhháá kyehti oho. Toh noheh porgemáánu 11. peeivi.
Käldeeh:
– Olympische Spelen starten vandaag, maar veel kaartjes en hotels nog beschikbaar (nos.nl)
– Stubb viettää loppuviikon Pariisin olympialaisissa, venäläisten osallistuminen varjostaa (www.hs.fi)
Kove: Danor Aharon (Pixabay)