Australialii vuoijâmvälmejeijee Michael Palfrey olympianaver ij oro pištemin kuhháá. Australia vuoijâmlitto lii vuolgâtmin suu pááikán tállân, tastko sun kyedittij maadâkorealii Kim Woo-min sahhiittâlmist já tuáivui, et taat vuáitáččij 400 meetter rijjâvuoijâm, veik kištoost lává fáárust meid kyehti australialii: Sam Short já Elijah Winnington. Taah kuulmâs, kiäh puohah láá vuáittám maailmmiäštárvuođâ, kuáhtájeh La Defense -areenast puáttee lávvárduv.
Kyedittem ij nube tááhust lah iimâš, tastko Palfrey lii valmim Kim Woo-min talle ko taat hárjuttâlâi olympialáid. Australia vuoijâmjuávkkuduv njunošvälmejeijee lâi kuittâg ton mielâst, et Palfray moonâi meendu kuhás. Sun lii hirmâd pettâšum. Suu mielâst ij lah tuhhiittettee, et juávkkuduv välmejeijee paijeed nube eennâm valastâllee jieijâs eennâm valastâllei ovdiibel.
Sydney Morning Herald -loostâ mield Palfrayst lijjii talle Australia tiimi pihtâseh pajalist ko sun adelij sahhiittâllâm maadâkorealáid toimâtteijeid. Sun meid čuorvij: ”Go Korea.”
Käldee:
– ”UnAustralian”: Swim-coach could be sent home for helping Korean rival (www.smh.com.au)
Kove: KeepActive Australia (Wikimedia Commons)