Musikkár Bruce Springsteen, 74, lii karttâm macâttiđ muáddi konsertis Euroopist tiervâsvuotâčuolmâi tiet. Ääšist muštâl eereeb iärásij US-ameriklâš Rolling Stone -lostâ.
Taan räi macâttum láá nelji Bruce Springsteen & The E Street Band -konsert Euroopist. Macâttum konserteh láá moonnâm lávurduv konsert Ranska Marseillest, konsert Tšeeki Prahast 28.5. sehe kyehti konsert Italia Milanost kesimáánu 1. já 3. peeivi. Lii lopedum, et konserteh uárnejuvvojeh maŋeláá.
Artist Instagram-sijđoost muštâluvvoo, et tuáhtáreh láá avžuuttâm Springsteenân love peeivi puudâ lávlumist. Vuossâmuš konsert macâttum konsertij maŋa ličij Espanja Madridist kesimáánu 12. peeivi. Springsteen konsertäigitaavlust lii meid Suomâ konsert Helsig olympiastadionist syeinimáánust. Masa puoh liipuh Suomâ konsertân láá jo vuobdum.
Majemui aaigij Springsteen konserteh iä mudoigin moonnâm aaibâs tego lijjii kolgâđ. Ive 2023 kuovâmáánust muáddi The E Street Band jeessân puáccájii koronan, já čohčâmáánust konsertráiđu potkânij ollásávt já konserteh sirdojii taan ihán, tastko Springsteenân šoodâi čuávjihävvi. Taan ive puoh lâi moonnâm pyereest Springsteen jienâčuolmâi räi.
Käldee:
– Bruce Springsteen vaikeuksissa – keikkoja peruttu Euroopassa (yle.fi)
Kove: Raph_PH (Wikimedia Commons)