Nuorah vajeh viehâ pyereest Säämist. Návt kavnâtteh áámmátulmuuh, kiäh pargeh nuorâi jiegâlijn torjuin já iššijn.
Nuorâiguin pargee áámmátliih kuittâg uáinih kyehti sierâ juávhu: oovtâ juávhust láá nuorah, kiäh vajeh pyereest, já nube juávhust láá nuorah, kiäh vajeh hyeneeht.
Säminuoráid fallum jiegâlii torjuu palvâlusâin lii iššeen jieijâs eenikielâ. Jis nuorâ haalijd sárnuđ sämikielâ teikâ savâstâllâđ sämikulttuur tobdee ulmuin, te sun stivrejuvvoo psykososiaallii palvâlus fällee Uuvjân. Uvjâ fáálá iše puoh Suomâst sarnum kuulmâ sämikielân.
”Nuorah pyehtih muštâliđ jieijâs vädisvuođâin älkkeebeht, já tom lii lamaš suotâs uáiniđ”, iätá Uuvjâ psykiatrisâš pyecceitipšoo Kaarin West Yle sahhiittâlmist.
West mield säminuorah atâštuveh siämmáin aašijn ko nuorah eres-uv kuávluin, ovdâmerkkân nuorâvuotân já puátteevuođâ epivisesvuotân kyeskee aašijn.
Háástuh lohtâseh táválávt sämikulttuurân, ovdâmerkkân sämmilij vuoigâdvuođáid já identiteetaššijd. Meiddei nuoráid já uáppeid čyeccee vátámâšah láá olluuh.
”Taan räi mij lep puáhtám išediđ puohâid, kiäh láá iše tarbâšâm”, iätá West.
Sämikuávlust nuorâi pyereestvajemân vaaikut positiivlávt nuorâi eromâš ohtâvuotâ luándun, mii nuorâipargei mielâst puáhtá ennuv ilo nuoráid.
Tave-Laapi uccâ päikkikuddijd lii lamaš vaigâd kavnâđ nuorâiguin pargee áámmátulmuid. Škovlâpsykolog finnim Anarân lâi masa máhđuttemes pargo, siämmáánáál Ucjuuhân-uv.
Ovdil Ucjuuvâ škovlâuáppeeh pessii sárnuđ škovlâpsykologáin tuše eromâšmáttáátteijee peht, já talle-uv tuše kuohtii ivveest.
”Mun lam aassâm Ucjuuvâst ubâ eellim já eskin taan ive čielgâi, ete kuohtii ivveest tääbbin iälá kiinii, kiäin piäsá sárnuđ”, imâštâl oovcád luoka uáppee Katri Lukkari Ylen.
Ko škovlâpsykologeh váiluh, te ulmuuh láá karttâm uástiđ palvâlusâid, já škovlâpsykolog saajeest lii fallum psykiatrisii pyecceitipšoo toorjâ. Meiddei oppâmvaigâdvuođáid lii lamaš vaigâd finniđ torjuu.
Nuorâi mielâst uáppei koskâsâš epitäsiárvu lii lasanâm Suomâst tondiet ko škovlâpsykologeh váiluh. Psykologij finnim lii miäruštâllum laavâst, mutâ uáppei mielâst laahâ ij kuittâg Ucjuuvâst olášuu. Škovlâpsykologeh váiluh meiddei Aanaar já Kolari kieldâin.
Ucjuuvâst lii kieskâd algâttâm uđđâ škovlâpsykolog, kote parga kieldâst tuše ihepele.
Škovlâtiervâsvuođâtipšoo Elle Aikio muštâl, ete sun vuáttá reesuursvänivuođâ vaikuttâsâid pargostis.
”Muu mielâst tom uáiná eidu tast, ete älkkees-uv teivâmáid lii hirmâd vaigâd kavnâđ ääigi já saje”, iätá Aikio.
Käldee:
– Koulupsykologi on harvinaisuus pohjoisessa – saamelaisnuorille löytyy kuitenkin apua, jopa omalla äidinkielellä (yle.fi)
Kove: WOKANDAPIX (Pixabay)