Moulin Rouge -kabareeklubi pegâlmâs pieggâmilo suájáh láá koččâm enâmân Pariisist. Pärtti tábáhtui kyevti já kuulmâ ääigi kooskâst cuáŋuimáánu 24. já 25. peeivi koskâsii iijâ. Páihálii piäluštemlágádâs mield ulmuuh iä lammâšum päärtist. Moulin Rouge lii ohtâ Pariisi pivnohumosijn uáinámušâin.
Moulin Rouge hovdâ Jean-Victor Clerico mield ij epiduu, et suájái koččâmân lohtâs riggeerim. Sun iätá, et suijân lii čielgâsávt teknisâš váddu. Koččâm tärhis suijâ ij lah kuittâg vala tiäđust.
Moulin Rouge (anarâškielân ruopsis millo) leehâi uvsâidis ive 1889. Tot lii tobdos stuorrâ ruopsis pieggâmilloost, mii lii rakânâs káátu alne. Kuhes historjás ääigi Moulin Rougest lâi tuše ohtâ stuárráb pärtti ive 1915, ko rakânâs puállái. Talle tot lâi kiddâ oovce ihheed.
Käldeeh:
– Pariisin Moulin Rougen kuuluisat myllynsiivet romahtivat (yle.fi)
– Moulin Rouge romahti (www.iltalehti.fi)
Kove: 139904 (Pixabay)