Jyehi-ihásâš várdámokko viettui moonnâm ohhoost 22.–28.4.2024. Várdájeijei várdámokko lii viettum jyehi ive ain Pase Irján nommâpeeivi (23.4.) ääigi. Pase Irján lii várdájeijei suojâlempasemus. Várdámohhoost várdájeijeeh táválávt kevttih várdámliijne jyehi saajeest, ovdâmerkkân škoovlâst já pargoost. Várdámoho ääigi láá táválávt meiddei maaŋgah tábáhtumeh.
Anarist Aanaar Tuodârkuumpih-lippukodde peesâi oovtâst Aanaar servikuddijn lávluđ vuosmuu keerdi várdámmessulavluid kyevti sämikielân, anarâškielân já pajekielân. Algâalgâlijd messulavluid čaalij Anna-Mari Kaskinen já nuottij Pekka Simojoki Loisto-stuorrâleeirân ive 1996, já lavluuh uđâsmittuvvii ive 2016. Lavluuh láá jurgâlum taan kiiđâ ääigi já ruttâdem toi jurgâlmân lii mieđettâm Kirkkohaldâttâh. Anarâškielân messulavluid lii jurgâlâm Jari Linjama já pajekielân Seija Risten Somby.
Sämivárdám pargojuávkku kijttá jurgâleijeid mielâttes puorijn jurgâlusâin, eromâšávt tiäđust-uv anarâškielâlijn lavluin Jari Linjama. Lavluin lii valdum pyereest huámášumán páihálâš kulttuur.
Käldeeh:
– Partioviikko (www.partio.fi)
Kove: Henna Tervaniemi