Tanska uáivikaavpugist Kööbenhamânist puolij pörssitáálu majebaargâ. Pyelimist tuušâi peeli rakânâsâst ollásávt. Časkâdempargoh pištii maŋgâ tijme. Piäluštâslágádâs muštâlij, ete časkâdem lâi uáli jo vaigâd eereeb iärrás veškikáátu já huksimsteligij keežild. Huksimsteligeh lijjii šipšâm tiet rakânâs pirrâ.
Kööbenhaammân kuávdáást uási ferttij sierriđ, já jotolâh orostittui pyelimist šoddâm suovâpoolvâ tiet. Táálu puállái majebaargâ tooláá iđedist. Eres lasseen pörssitáálu pegâlmâs piätukyevditornâ koočâi pyellim tiet. Stuorrâ uási rakânâs sissoojijn sehe ton puáris veškikáttu puollii masa ollásávt. Piäluštem- já časkâdempargoid uásálistii aldasáid 200 puálu- já poolisalmajid majebaargâ. Puálukodde ferttee kocceeđ pyellim vala 24 tijme ääigi. Puállám suujâst ij lah vala tiätu.
Pörssitáálu tuáimá onnáá peeivi Tanska kävppikáámmár toimâttâhrakânâssân. Uási rakânâsâst lii 400 ihheed puáris. Pörssitáálu lii ohtâ Kööbenhaammân puárásumos rakânâsâin. Tot valmâštui ive 1625, já tot lii kulttuurlávt uáli merhâšittee rakânâs. Majemui aaigij pörssitáálust láá tohhum ovdištempargoh juhleive várás. Puáttee ive rakânâs ličij tiävdám 400 ihheed.
Käldeeh:
– Kööpenhaminan Pörssitalon tulipalo on saatu hallintaan (yle.fi)
– Pörssitalosta tuhoutui palossa puolet – Paikalliset kertovat järkytyksestään (www.hs.fi)
Kove: Jebulon (Wikimedia Commons)