Tampere ollâopâttuv kielâkuávdáš uárnee sehe págulijd kielâ- já viestâdemkuursâid já valjimiävtulijd uápuid. Tampere ollâopâttuv šoddâdemtiettuu já kulttuur tieđâkode deekaan Tiina Silander muštâl, et lâi pággu tärhistiđ máttááttâsfalâlduv ekonomiatile keežild. Tile- já pälkkikoloh láá pajanâm, mut vaidâlittee kale kielâkuávdáá budjet ij paijaan. Silander muštâl, et kielâkuursah sättih maccâđ falâldâhân puátteevuođâst, jis toos kávnojeh resurseh.
Puáttee ive rääjist kielâkuávdáš looppât jaapaan-, italia-, kiina-, korea- já portugalkielâ uápuid ollásávt. Meiddei eres kielâi máttááttâs kiäppán. Kielâkuávdáš keeppid ranska- já saksakielâ uápuid 500 kurssâsaje verd. Ton lasseen kielâkuávdáá falâlduvvâst pääcih meddâl kyehti kuursâ náguskirjetotkei várás: Writing for Research já Research Presentation. Olgoeennâmliih uáppeeh-uv kierdih kielâuápui čuoppâmist, ko S2-uápuh (suomâ viereskiellân) kiäppáneh čuuvtij.
Jaapaankielâ máttáátteijee Naoko Miyamoto-Maunu lii murâšlâš já pettâšum. Sun muštâl, et jaapaankielâ kuursah ollâopâttuvvâst lijjii nuuvt pivnoheh, et puohah, kiäh halijdii máttááttâllâđ kielâ, iä ubâ čaahâm kurssáid. Sun meiddei iätá, et motomeh uáppeeh vuávájii vyelgiđ muulsâuáppen Japanân, mut tääl sij iä lah innig vissáseh tondiet ko sij iä tuostâ vyelgiđ enâmân kielâtáiđuttáá.
Suomâkielâ máttááttem keeppidmeh vist vaigutteh toos, et olgoeennâmliih uáppeeh iä pääsi Suomân valmâštum maŋa. Ij lah älkkee uážžuđ pargo ige mudoigin algâttiđ jieijâs eellim olgoenâmist, jis ij määti páihálii kielâ. Kielâkuávdáá máttáátteijeeh muštâleh, et tääl sij pyehtih orniđ tuše motomijd aaleeb tääsi kielâkuursâid. Algâkuursah láá kale pyereh já teháliih, mut toh iä iššeed hirmâd ennuv olmâ elimist.
Kielâi máttááttem Suomâst kiäppán ubâ ääigi. Ain häärvib syemmilâš máttá eres viereskielâid ko eŋgâlâskielâ. Uáppeeh luvâlduvâin harvii väljejeh škoovlâst uánihijd kielâid, pic sij väljejeh mielâstubbooht matematiik kuursâid, ko tain lii stuárráb árvu, jis haalijd peessâđ ollâopâttâhân pajeuáppeetuođâštussáin.
Käldeeh:
– Tampereen yliopisto karsii kielitarjontaa – japanin opettaja: ”Olo on järkyttynyt ja surullinen” (yle.fi)
– 16 yliopistossa opettavaa: Näin laajasti kieltenopetuksen leikkaukset vaikuttavat (www.aamulehti.fi)
– Monipuolinen kieltenopiskelu on osa yhteiskunnan menestystä (kieliasiantuntijat.fi)
Kove: Marko Kallio / Skyfox / Tampereen yliopisto