Várádâhkuárŋoo Tenzi Sherpa kuvvij videon Mount Everest nyeskivuođâ. Sun iätá, et sun lii tuálvum tobbeen meddâl luonijd suullân 200 kiilud.
– Jis tun jieh haalijd salkkiđ ruskijdâd, te ele talle puáđigin! Kyeđe ruskijdâd páikkásâd, ele várádâhân! Sherpa muštâl videost.
Paijeel 600 olmožid irâtteh kuárŋuđ Mount Everest oolâ jyehi kuárŋumpaje tai motomij ohoi ääigi, kuás šoŋŋâ lii kuárŋumân hiäivulâš. Ton lasseen jyehi kuárŋoo várás lii ucemustáá ohtâ páihálâš pargee, kote määlist, kuáddá tiiŋgâid já uápist kuárŋoid.
National Geographic mield Mount Everest lii maŋgii nuuvt pakkâtievâ ulmuin, et kuárŋooh távjá kärttih čuážžuđ maŋgâ tiijme kolmâ šooŋâst vyerdimin čookán peessâm. Tobbeen áimu lii nuuvt asettem, et vuoiŋâmân tarbâšuvvoo happinaamar.
Jieškote-uv kuárŋoo viättá várádâhleeirâin maŋgâ oho, tastko ovdil čohe väldidem kuárŋoo kalga heiviittiđ roopâs asettes ááimun. Taan ääigi juáháš pyevtit suullân käävci kiilud ruuskijd, já stuárráámus uási ruuskijn pääcih várádâhân. Vieltih láá tievâ ruuskijn, maid ulmuuh láá tohon kuáđđám.
Base Campist láá telttahiivsigeh, main láá stuorrâ nuurrâmfarppâleh, maid puáhtá kyeddiđ meddâl já salkkiđ. Toos hiivsigeh tastoo noheh-uv, já olmooš taha tárbuidis luándun.
Šoŋŋâdâhnubástus toovât muottui já jieŋâ suddâm, mii vuod puáhtá uáinusân ain eenâb ruuskijd, moh láá lamaš jieŋâ já muottui vyelni jo maaŋgâid luuvijd iivijd. Puoh taat nyeskivuotâ tuššâd luándu, já tot vist toovât stuorrâ tiervâsvuotâriiskâ puoh Mount Everest kulgâmkuávlu ässeid.
Käldee:
– Trash and Overcrowding at the Top of the World (education.nationalgeographic.org)
Kove: Simon (Pixabay)