Syemmilâš Aleksi ”Aleksib” Virolaisii juávkku Natus Vincere vuoitij Counter-Strike 2 ‑speelâ Major-turnaamist Kööbenhamânist maŋŋeed pasepeeivi ehidist njuhčâmáánu 31. peeivi. Major lii speelâ tehálumos já stuárráámus turnam. Natus Vincere ađai Na’Vi vuoitij finalist kievrâmus vyeitteeiävtukkâs Faze Clan kárttávuáituiguin 2–1. Spellum kártáh lijjii Ancient (Na’Vi vuoitij 13–9), Mirage (Faze Clan vuoitij 13–2) já Inferno (Na’Vi vuoitij 13–3). Turnam váldupalhâšummeen lijjii suullân 460 000 eurod.
27-ihásâš Virolaisii lasseen Na’Vi-juávkun kuleh liettualâš Justinas ”jL” Lekavicius (24 ihheed), romanialâš Mihai ”iM” Ivan (24 ihheed) sehe ukrainaliih Valeriy ”b1t” Vakhovskiy (21 ihheed) já Ihor ”w0nderful” Zhdanov (19 ihheed). Meiddei juávhu välmejeijee Andrey ”B1ad3” Gorodenskiy (37 ihheed) lii ukrainalâš.
Turnamvuáittu lii Virolaisii, Lekavicius, Ivan já Zhdanov vuosmuš Major-vuáittu. Siämmást tot lii vuosmuš kerdi, ko syemmilâš, liettualâš já romanialâš láá vuáittám Major. Vakhovskiy já Gorodenskiy lává vuáittám Major tääl kuohtii; sunnuu vuosmuš kerdi lâi meiddei Na’Vist ive 2021 Tukholmast.
Taat lâi nubbe kerdi ko Aleksi Virolainen speelâi Major-finalist. Ovdebáš kerdi lâi ive 2019, ko Virolainen laiđij imâšlávt syemmilii ENCE-juávhu finalân. ENCE kuittâg táppái 0–2. Muádi mánuppaje táápu maŋa Virolainen iäruttui juávhust. Ton maŋa sun lii spellâm maaŋgâ almugijkoskâsii juávhust. Major-vuáittu lâi eromâš tehálâš Virolaisâžân, kii lii karrieeris ääigi epidum já pelhittum ennuv. Turnam nuuvâi-uv Virolaisii vildáás juhlijd. Tot oinui meid sahhiittâlmist, ko Virolainen čuárvui suomâkielân: ”Torilla tavataan!”
Counter-Strike 2 lii peividum versio Counter-Strike: Global Offensive ‑speelâst. Tast spellih kyehti juávhu, main nubbe iirât pacâttiđ poomi spellâkártá tiätu kuávluin, já nubbe vuod iirât estiđ tom. Áámmáttääsist spellâ váátá ovdâmerkkân jotelis refleksijd já miärádâsâid, pehtilis viestâdem juávkkukuoimijguin sehe jieškote-uvlágánij taktiikij rähtim já olášuttem.
Čuávuvâš Major-turnam uárnejuvvoo Shanghaist juovlâmáánust taan ive.
Käldeeh:
– Aleksi Virolainen, 27, voitti maailman suurimman CS-turnauksen! Hurja voittopotti (www.is.fi)
– Navi Beat Faze to Win PGL Major Copenaghen (www.hltv.org)
Kove: Esports Kingdom (Wikimedia Commons)