Cuáŋuimáánu 3. peeivi uárnejui Aanaar kirjeráájust Anniina Veitonmäki PATU-kirje almostittemtilálâšvuotâ. Kirje lii párnáikirjerááidu 1. uási, já tot lii uáivildum párnáid luuhâm opâttâllâm várás. Mainâseh láá stavâlistum já uccâ pustavijguin čallum. Anniina lii jieš kuvvim kirje.
Tilálâšvuođâst lijjii fáárust suullân 40 olmožid, kiäin stuárráámus uási lijjii Aanaar já Avveel škoovlâ anarâškielâ uáppeeh. Tilálâšvuođâst tuállojii kyehti sahâvuáru, kuldâlui livđe já lonottuvvojii kulluumeh já jurduuh. Rivdul nuorâ livđojeijee Sampo Oskari Sieppi livđui kuldâleijeid Patu-livđe, mii ruvnái juhlálâš tilálâšvuođâ.
Anniina Veitonmäki muštâlij sahâvuárustis, maht algâjuurdâ párnáikiirján šoodâi. Eidu korrâ tárbu älkkeht luvâttittee kirjijd movtijditij suu usâškyettiđ ruttâdem, čäliškyettiđ já máálááškyettiđ PATU-mainâs.
”Mun lijjim pargoost algâmáttááttâsâst Aanaar škoovlâst já huámmášim, et älkkeht luvâttittee kirjeh vailuu masa ollásávt anarâškielân.”
Kirje válduhuáđđoo Patu lâi Anniina uáppee timmâsierâ.
”Patu lâi muu uáppei mielâst uáli jo hitruus huáđđoo. Te mun smiettim, et amahân PATUst ličij suotâs luuhâd mainâsijd-uv.”
Almostittemtilálâšvuođâst Anniina pajedij eidu uáppeidis rooli kirje algâjurduu šoddâdmist, já sun palhâšij-uv Aanaar škoovlâ niäljádluokkalijd PATU-kirjijguin.
Anniina sahâvuáru já kijtossaanij maŋa kirjerááju hoittájeijee Anna Roos muštâlij vala kuldâleijeid, mondiet luuhâmtáiđu ovdánem já luuhâmmoovtâ tiet lii tehálâš, et párnáid lii vuovâs já ahetáásán mudágâš luhâmuš faallâmnáál.
PATU-párnáikirjerááiđust láá ohtsis käävci kirjed. Tain čiččâm láá jo čallum. Lase kiirjij almostittem lii kiddâ ruttâdmist.
”Talle ko mun finniim uđđâ ruttâdem, te mááláám lase kuuvijd.”
Kaisa Tikka-Morottaja
Kove: Kaisa Tikka-Morottaja