Suklaa lii puohâi mielâhersku. Suklaakonvehteh láá veltimettumeh juovlâpeevdist, já suklaamaneh láá tergâdeh maaŋgâi pessijái juhlomist. Syemmilâš porá-uv koskâmiärálávt 6,5 kiilu suklaa ivveest. Maggaarsun ličij argâ suklaattáá? Tot sáttá forgâ leđe olmâ huolâ.
Stuárráámus uási maailm kaakaost viljâluvvoo kyevti Viestâr-Afrik staatâst: Ghanast já Elefanttähtiriddoost. Vaidâlitteht Viestâr-Afrik lii karttâm killáđ korrâ šooŋâid, sehe taavdâid, moh láá kepidâm kaakaošaddoduv. Kaakaošaddo ij killáá šoŋŋâdâhnubástus mield puáttee liegâsvuotâ- já šoŋŋânubástusâid. Motomij árvui mield kaakao viljâlem ij pište innig ko ihán 2050.
Ghana já Elefanttähtirido kaakaošaddoduvah láá koččâmin masa piälán vuordust. Taat tiäđust-uv paajeed kaakao hade.
Ovtâstum aalmugij (OA) kävppi- já ovdánemornijduv mield kaakao hadde lii pajanâm pelnub ive ääigi suullân 140 %. Tääl kaakao hadde lii masa 10 000 eurod per tuhháát kiilud, já tot juátká pajanem. Kaakao hadde tiäđust-uv vaaigut meid suklaa haadan. Statistiikkuávdáá mield ive 2022 kuovâmáánu rääjist suklaa hadde lii pajanâm suullân 18 prosentid.
Taan suujâst suklaavalmâšteijeeh láá usâškuáttám sajasii kaakaon. Ovdâmerkkân syemmilâš Fazer lii vaalmâštškuáttám suklaa, mast lii kaakao saajeest valje. Fazer ij lah kuittâg muttemin oovtâgin jo vuábdust leijee pyevtittâsâin.
Fazer lii keččâlâm meid jieškote-uvlágánijd taavijd čuávdiđ kaakaoviljâlem čuolmâ. Ohtâ tain lii
sellâviljâlem. Kaakao sellâviljâlem meerhâš, et kaakao puávtáččij viljâliđ laboratoriost. Sellâviljâlum kaakaost ij lah vala aaibâs siämmáš smakkâ ko luándulâš kaakaost, mut tutkâmušâi ovdánem mield smakkâ-uv puárán.
Kaakaost lii vala máhđulâšvuotâ selvâniđ. Aalto-ollâopâttuv professor Matti Kumpu mielâst lii aaibâs máhđulâš vala uážžuđ kaakao selvâniđ šoŋŋâdâhnubástus hämmim maailmist, jis stuorrâ suklaa- já kaakaoirâttâsah vuájuh kaakaoviljâlmân já ton killeelvuotân sehe viljâleijei škovliittâsân já eellimtáásán. Talle mii suhâpuolvâ ij lahkin majemuš, mii uážžu navdâšiđ olmâ kaakaost.
Käldeeh:
– Kaakao kallistuu räjähdysmäisesti – Fazer etsii sille jo vaihtoehtoja (www.hs.fi)
– Kaakaon loppu? (yle.fi)
– Kaakao on nyt kupariakin kalliimpaa, ja se voi nostaa ensi pääsiäisen suklaamunien hinnat pilviin (yle.fi)
– Kaakaon sadosta tulossa katastrofaalisen huono – voi käydä suklaan ystäville kalliiksi (www.mtvuutiset.fi)
Kove: Alexander Stein (Pixabay)