Kanada haldâttâs áigu faallâđ nuuvtá äpittesvuođâ estim eennâm puoh suhâjuátkimahasáid nisonáid. Ääšist muštâlij Kanada išeuáiviminister Chrystia Freeland.
Estimpillerij hadde lii Kanadast suullân 205 eurod ivveest. Hormonspiiraal máksá suullân 345 eurod ivveest. Nuuvtá äpittesvuođâ estim faallâm lii Kanada tiervâsvuotâtipšovuáháduv stuárráámus nubástus maaŋgâlov ihán. Nubástusân kulá meid diabetestalkkâsij kuástádâsâi sajanmäksim. Tiäđáttâsâstis Kanada haldâttâs tiäddut, et estimvuovij já diabetijkkárij talkkâsij kuástádâsah láá ohtâ stuárráámuin suujâin, mii iästá toi kevttim.
− Nisonijn alnestis kolgâččij leđe vuoigâdvuotâ meridiđ jieijâs tiervâsvuođâst já roopâst. Mii vuávám lii faallâđ nuuvtá almolijd estimvuovijd, tego estimpillerijd, hormonspiiraal já joba monnjâestim, meerhâs tom, et oovce miljovn nissoon valjimrijjâvuotâ (freedom of choice) lii tuođâi ”rijjâ”. Já tot meerhâš, et eenâb kanadalijn nisonijn lii rijjâvuotâ meridiđ jieijâs roopâst já elimist, Chrystia Freeland muštâl Kanada vuáváámijn.
Kanada mielâtiervâsvuotâ- já uáiváditteehuolâttâsminister Ya’ara Saks kommentistij ääši návt:
− Mij visásmittep, et nisonijn lii rijjâvuotâ sundáttâllâđ jieijâs puátteevuođâ já meridiđ, kuás sij halijdeh perruu. Kanadaliih iä kolgâččii kuássin karttâđ valjiđ tiervâsvuođâs já rekigij mäksim kooskâst.
Uđâsmittem äigitavlu ij lah vala tiäđust. Tot váátá meid Kanada kuávluhaldâttuvâi tuhhiittem.
Nuuvtá estim nisonáid lii ovdil keččâlum Kanadast Brittilii Kolumbiast sehe Manitobast.
Käldee:
– Kanada aikoo tarjota ilmaisen ehkäisyn naisille (yle.fi)
Kove: Béria L. Rodríguez (Wikimedia Commons)