Sveiccilâš IQAir-irâttâs raapoort tieđettij moonnâm ohhoost, et maailm puttásumos áimu kavnuuččij Suáđigilist, Ucjuuvâst já Kuácámist. Tast muštâlii eres lasseen Helsingin Sanomat já meid Anarâš aavis. Täin soojijn ááimu muálučalmai meeri ivveest ličij raapoort mield koskâmiärálávt 0,3 mg kuđâhâšmeetterist.
Áimutiettuu lágádâs totkee Katriina Kyllösii mielâst taat ij pyevti toollâđ tiäivás. Koillissanomat-loostâ sahhiittâlmist sun iätá, et taat árvu lii epirealistlâš. Sun ij osko, ete kosten nannaamkuávlust puávtáččij mittediđ nuuvt vyeligis áárvuid ivveest. Áimutiettuu lágádâs tärhistum já lyetittettee tutkâmtiäđu mield Suomâ puttásumos áimu kávnoo eidu tääl Pallasist. Pallasist ááimu muálučalmai meeri lâi moonnâm ive 1,5 mg kuđâhâšmeetterist.
Kyllösii mield IQAir raportist láá kevttum meid virgáliih tiäđuh, moh iä lah tärhistum, sehe irâttâs jieijâs satelliitpyevtittâssáin mittedum tiäđuh já ulmui sensorijguin mittedum tiäđuh. Irâttâs lii kiävttám virgálijd tiäđuid meid Suomâst, mut toh láá pááccám täärhisthánnáá. Kyllönen uáiná, et raapoort lii kuittâg sunde adeleijee.
Käldee:
– Koillissanomat: Kuusamon, Utsjoen ja Sodankylän ilmaa väitettiin maailman puhtaimmaksi, Ilmatieteen laitos tyrmää (www.hs.fi)
Kove: Ximonic (Simo Räsänen) (Wikimedia Commons)