Vástuppeeivi 16.2.2023 sämikielâ já sämmilii kulttuur uáppeeh čokkânii Teekkaritáálust Oulust. Tobbeen lâi Sámefeasta-tábáhtume, mon uárnejii oovtâst Gieku-servi já Oulu2026 ornijdume. Gieku lii sämikielâ já sämmilii kulttuur uáppei servi Oulu ollâopâttuvvâst. Gieku uárnee tábáhtuumijd pirrâ ive, ovdâmerkkân kähvipuudâid já spellâehidijd. Oulu2026 vist uárnee kulttuurtábáhtuumijd Oulust, tastko Oulu lii ive 2026 Euroop kulttuuruáivikaavpug. Sämmilâš kulttuur lii tehálâš uási Oulu2026 ohjelmist. Taan ive Oulu2026 lâi orniimin meiddei sämmilii aalmuglâšpeeivi seminaar já konsert.
Sámefeasta-tábáhtume ohjelmist lijjii biŋgo, vuárbádmeh já muusik. Tehálumos äšši lâi kuittâg viettiđ ääigi skipárijguin já suotâstâllâđ. Uárnejeijeeh fallii popcornijd, siipsijd já sääpi. Táválávt tábáhtuumijn uáppeeh kárvudâteh Gieku-haalaráid, mut Sámefeastast koolgâi kárvudâttâđ mááccuháid teikkâ eres juhlepihtâsáid. Teekkaritáálu uuvsah lekkâsii tijme 18:00, já tijme maŋeláá aalgij biŋgokišto. Tijme 21:00 DJ Ailo poođij lyeve oolâ, já te ulmuuh tánssááškuottii. Tuše muáddi ulmuu paccii čokkáđ.
Ubâ eehid lâi máhđulâš uástiđ vyerbiliipuid. Koskâiijâ seervi stivrâjesâneh vuárbádii vittâ luholii ulmuu, kiäh ožžuu palhâšuumijd. Uáivipalhâšummeen lâi poccuu čuárbpeeli. Vuárbádmij kulluuttem maŋa DJ Ailo maacâi lyeve oolâ. Te DJ Ailo kulluuttij, et sust lâi olâttâs: nube artist lávdástem. Talle lyeve oolâ poođij ráppájeijee Yungmiqu, kii ráppái jieijâs uđđâ lavluu. Ton maŋa Yungmiqu já Jezebro ráppáin oovtâst Cokká gávtti -nommâsii lavluu.
Tábáhtume luhostui pyereest. Ulmuuh lijjii ennuv, já ubâ ääigi lâi miinii tábáhtuumin. Kuovâmáánu loopâst Gieku uárnee oovtâst Index (viestâdemtieđâ) já Meteli (arkeologia) uáppei servijguin tábáhtume, mon fáddán lii Lord of the Rings. Tuáivu mield tot luhostuvá siämmáá pyereest.
Kove: Jasmina Schreck