Saksalâš oovdiš jyelgipálluspellee Andreas Brehme lii jáámmám 63-ihásâžžân. Sun jaamij fakkist já vyerdimettumávt váimuinfarktân majebaargâ vuástásii iijâ. Nuuvt tieđettij Brehme pelikyeimi Susanne Schaefer majebaargâ iiđeed.
Brehme speelâi vistig Viestâr-Saksa já Saksai ovdâstume maŋa Saksa eennâmjuávhust 68 spellâd iivij 1984−1994. Ive 1990 Viestâr-Saksa vuoitij jyelgipáálu maailmmiäštárkištoid, ko Brehme teividij moolân ráŋgáštâsčiehčâmáin finalist Argentina vuástá eidu ovdil loppânjurgim. Viestâr-Saksa vuoitij Argentina talle mooláin 1−0. Brehme speelâi meid Viestâr-Saksa eennâmjuávhust, ko tot poođij nubben maailmmiäštárkištoin ive 1986, sehe Saksa eennâmjuávhust, ko tot poođij nubben ive 1992 eurokištoin.
Peic Viestâr-Saksa já Saksa eennâmjuávhuin Brehme speelâi jyelgipáálu meid Kaiserslautern já Bayern München -juávhuin Saksaast sehe Interist Italiast já Real Zaragozast Espanjast. Sun tooimâi meid välmejeijen.
Brehme jäämmim lii jo nubbe stuorrâ monâttâs saksalii jyelgipáálun uánihis ääigi siste tastmaŋa ko oovdiš jyelgipálluspellee já -välmejeijee Franz Beckenbauer jaamij uđđâivemáánust 78-ihásâžžân.
Käldeeh:
– Fußball-Weltmeister Andreas Brehme ist tot (www.welt.de)
– Jalkapallolegenda Andreas Brehme, 63, on kuollut (www.hs.fi)
Kove: Christophe95 (Wikimedia Commons)